Aqtóbede sýǵa ketken mektep oqýshysy tórt táýlikten beri tabylmaı jatyr

AQTÓBE. KAZINFORM – Yrǵyz aýdany Mamyr aýylynda 16 jastaǵy oqýshyny izdeý jumysy shamamen 4 táýlikke sozyldy. Sýǵa batyp ketken bozbalany izdeýge qosymsha kúsh jumyldyryldy.

Yrǵyz aýdany Mamyr aýylynda eki bala sýǵa túsýge barady.

Aýyl turǵyndarynyń aıtýynsha, aýdan ortalyǵyndaǵy mektep-gımnazııada bilim alǵan 10 synyp oqýshysy aýylǵa demalysqa kelgen. Sodan dosy ekeýi ózenge baryp, biri sý betine shyqpaı qaldy. 5 maýsymnan bastap aýyl adamdary túgel izdeýge jumyldy, sonymen birge tótenshe jaǵdaılar qyzmeti drondy da iske qosty. 

- 2009 jyly týǵan jasóspirimdi izdestirý jumystaryna arnaıy jasaqtalǵan izdestirý-qutqarý toptary jumyldyryldy. Qatty jel aǵysty kúsheıtip tur. Sonymen birge sý túbi laı, kórinbeıdi. Bul úlken kedergi. Barlyǵy 42 adam sol jaqta júr. Olardyń 12-si tótenshe jaǵdaılar qyzmetkeri. Jergilikti atqarýshy organnan 5, polıtsııadan 5 qyzmetker bardy. Sonymen birge eriktiler de bar. Sý astyndaǵy jaǵdaıdy baqylaýǵa múmkindik beretin sý asty drony da iske qosylǵan,- dep habarlady oblystyq TJD baspasóz qyzmeti. 

Oqıǵa ornyna búgin taǵy ondaǵan adam barady. Olardyń qatarynda tótenshe jaǵdaılar qyzmetinen 4, 20982 áskerı bóliminen 40 qyzmetker bar. Súńgýirler men kınologtar da jumyldyrylyp jatyr. Barlyǵy izdeýge taǵy 46 adam jumyldyrylady. 

Aıta keteıik, bozbala 5 maýsym kúni tústen keıin sýǵa ketken. Búgin izdeý jumysynyń jalǵasyp jatqanyna tórt táýlik tolady. 

Eske salsaq, 3 maýsym kúni Muǵaljar aýdany Qyrǵyz stansasyndaǵy sý bógetinen eki adamnyń denesi tabyldy. Olardyń biri 60, ekinshisi 35 jasta. Ekeýin de jedel qutqarý jasaǵy sýdan alyp shyqty.