Aqtóbede «sýǵa ketemiz» degen áıelder tas joldy jaýyp tastady
AQTÓBE. QazAqparat - Aqtóbe qalasynda «Romashka» saıajaıynyń turǵyndary úılerin tasqyn sýdan qorǵaý úshin amalsyz tas joldy jaýyp tastady, dep habarlaıdy QazAqparat tilshisi.
Aqtóbe qalasynda sý tasqynynyń aldyn alý jumystary júrgizilýde. Biraq tótenshe jaǵdaılar qyzmetiniń jedel shtaby barlyq shaqyrýǵa birden baryp úlgermeı jatyr. Qazirgi ýaqytta qala mańyndaǵy «Romashka» saıajaıynyń turǵyndary «Aqtóbe-Bogoslovka» tasjol boıyna shyǵyp, kólik qozǵalysyna kedergi keltirdi.
«Biz búgin kúndiz saǵat 14:00-den bastap jedel shtabqa qońyraý shala bastadyq. Biraq birde-bir adam kelip, kómek bermedi. Qazir jolda júrmiz. Bizdi kórip, polıtsııa qyzmetkerleri keldi. «Jaýapqa tartylasyńdar, isteriń zańsyz» dep qorqyta bastaǵasyn, kólikterdi jiberdik. Tańǵy saǵat 4:00-de jattyq. Búgin jumystan soń úıime bara almadym»,- dedi saıajaı turǵyny Aınur Nurjanova.
Atalǵan saıajaı turǵyndarynyń aıtýynsha, erigen qar sýy ótken jyly joldyń durys salynbaýynan baǵyty ózgergen.
Bogoslovka tas jolynyń janyndaǵy dachalardaǵy úıler sýǵa ketip jatyr turǵyndary kómek suraǵanymen eshkim kelmegen narazylyq retinde adamdar trassany jaýyp tastagan
«Saıajaıda turǵanyma bes jyl boldy. Ótken jyly sý kóp jınalǵanda da bizge qaýip tónbedi. Al bıyl qar az bolsa da, biz qyzyl sý astynda qaldyq. Jazda atalǵan jol salynǵan kezde sý júrýge yńǵaıly, tártippen salýdy usynǵan edik. Biraq qala ákimi Іlııas Ispanovtyń atyna jazǵan hatymyz jaýapsyz qaldy. Saıajaı bazarǵa jaqyn ornalasqan, sol jerge jınalǵan qar sýynyń bári biz jaqqa aǵyp kelýde»,- dedi A.Nurjanova.
Aıta keteıik, qazir turǵyndar jaýapty qyzmetkerlerdi kútip tur.
