Aqtóbede sýdan qutqarýshylarǵa shaqyrtý kóbeıdi
AQTÓBE. QazAqparat - Aqtóbe qalasynda sýdan qutqarýshylar kúnine 100-den astam shaqyrtýǵa baryp júr. Kóbi kóshedegi qar sýynyń aýla ishine kirip ketýinen qaýiptenedi, dep habarlaıdy QazAqparat tilshisi.
Aqtóbe qalasyndaǵy sý tasqynyna qarsy shtab qazir aýyldyq okrýgterdegi ahýaldy baqylap júr. Qala mańyndaǵy Keńes Nokın, Qyzyljar, Bekqul baba aýyldaryndaǵy jyralardy tazartyp, aýmaǵyn keńeıtý jumystary bastaldy. Osy arqyly sý aǵysynyń arnasyn keńeıtip, kedergilerdi joıý kózdelgen.
«Ótken jyly qaýip tóngen aımaqtarda jazda aldyn alý jumysy júrgizildi. Bıyl ol aýmaqtarǵa ekskavator men sý sorý kólikteri aparyldy, biraq jyralar arqyly sý kedergisiz aǵyp jatyr. Negizinen shtabǵa tústen keıin jıi qońyraý shalyp, kómek suraıdy. Olar kóshedegi sýdyń aýlaǵa kirip ketýinen qorqady. Komıssııa baryp, qaýipti ekenin anyqtasa, sý sorý jumystary júrgiziledi»,- dedi Aqtóbe qalasy ákimi apparatynyń janyndaǵy sýdan qutqarý bóliminiń basshysy Bekbolat Nurashev.
Aıta keteıik, keshe qala boıynsha 126 shaqyrtý túsken. Kóbi Qurmysh, Máskeý, Zarechnyı men Ońtústik-Batys aýdanynyń turǵyndary.
«Qala mańynda Sazdy, Qarǵaly, Aqtóbe sý qoımasy bar. Bul jerlerdiń sý qabyldaý múmkindigi joǵary. Ázirge eshqandaı qaýip joq. Sýǵa ketkender de tirkelmedi. Al aldyn alý jumystary jan-jaqty júrip jatyr»,- dedi B.Nurashev.
«Qazgıdromet» memlekettik kásiporny aqtóbelikterge 8-13 sáýir aralyǵynda qar kúrt erip, ózenderdegi sý deńgeıi kóteriledi degen eskertý berdi. Sonymen qatar, sý tasqynyna qarsy shtabtyń telefondary taratyldy.
