Aqtóbede sýburqaqtardy jóndeý jumysy uzaqqa sozylyp ketti
AQTÓBE. KAZINFORM – Oblys ákimdigi mańyndaǵy sýburqaqty jóndeý jumysy aıaqtalmaı, is sotqa jiberildi. Sonymen birge sýly-jasyldy býlvardaǵy jóndeý jumystar 5 jylǵa sozylyp ketti.
Aqtóbe oblysynda bıyl 20 sýburqaq iske qosylady. Búginde onyń kóbi jumys istep tur. Alaıda jóndeý jumysy birneshe jylǵa sozylǵan problemalyq nysandar da bar. Sonyń biri – sýly-jasyldy býlvar. Munda jóndeý jumysy 2021 jyly bastalǵanymen, ákimdik pen merdiger arasyndaǵy sot protsesi birneshe jylǵa sozyldy. Endi jumysty demeýshiler aıaqtaýy múmkin.
- Qazirgi tańda qaıta jobalaý jumystary júrgizildi. Endi demeýshiler esebinen jóńdeý josparlanyp otyr. Aqtóbe oblysy ákimdigi mańyndaǵy sýburqaqtyń merdigeri – «ıÝvon elektro stroı» JShS. Abaı saıabaǵyndaǵy sýburqaq jumysy boıynsha sot protsesi júrgizilýde. Sottyń sheshimi shyqqan soń, ıaǵnı jyl sońyna deıin qosý josparlandy,- dedi Aqtóbe qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń bas mamany Talǵat Naýryzov.
Bıyl Aqtóbe qalasyndaǵy Táýelsizdik dańǵylynda ornalasqan jelilik saıabaqta jańa sýburqaq iske qosyldy. Sonymen qatar uzaq jyldar jumys istemeı turǵan taǵy 2 sýburqaq jóndelip jatyr. Onyń biri keshe iske qosyldy.
- Sýburqaqtardy kútip ustaý «KPD Qurylys» JShS-niń mindeti. Merdiger konkýrstyq negizde anyqtaldy. Kelisimshart somasy – 45 mln teńge. Kompanııa sýburqaqtardy tazalaý, iske qosý, kútip ustaý, kúzde qysqy maýsymǵa jabý jumystaryn júrgizedi,- dedi Talǵat Naýryzov.
Aıta keteıik, jyl saıyn mamyr-qyrkúıek aılary aralyǵynda sýburqaq sýlaryna sanıtarııalyq-epıdemıologııalyq monıtorıng júrgizilip, vırýsologııalyq zertteýler úshin sý synamalary alynady. Departament deregine sáıkes sýburqaq sýlary vırýsty A gepatıti, rotovırýs jáne enterovırýs kórsetkishterine zertteledi.
