Aqtóbede sý jáne elektrmen jabdyqtaý jelileriniń qansha paıyzy tozdy
AQTÓBE. KAZINFORM - Qazirgi kezde sýmen jabdyqtaý jelisiniń tozýy 53,40% bolyp tur. Al elektr jelileriniń 76% jýyǵy jańǵartýdy qajet etedi.
Aqtóbeniń kommýnaldyq kásiporyndary «Energetıkalyq jáne kommýnaldyq sektorlardy jańǵyrtý» ulttyq jobasyna ótinish berdi. Tozyǵy jetken ınjenerlik ınfraqurylymdy jańǵyrtýǵa baǵyttalǵan jumys tozý kórsetkishin tómendetýi tıis.
- Qazirgi kezde «Aqtobe su-energy group» AQ-y sýmen jabdyqtaý jelisiniń 53,40%, sý burý jelisiniń 71,90%, jylýmen jabdyqtaý jelisiniń 53,90% tozyp tur. Al «Alǵa jylý» KMK-de sý burý 62,8%, jylýmen jabdyqtaý 86% tozdy. Al ulttyq jobaǵa engen «Badamsha servıs» KMK-de sý burý jelisiniń 87% jańǵyrtýdy qajet etedi. Joba aıasynda «Aqtobesu-energy group» AQ-y jalpy somasy 9,53 mlrd tg, «Alǵa jylý» KMK-y 949,61 mln tg, «Badamsha servıs» KMK-i 431,4 mln teńgeniń ótinimin berdi,- dedi QR Ulttyq ekonomıka mınıstrligi Tabıǵı monopolııalardy retteý komıtetiniń Aqtóbe oblysy boıynsha departamentiniń basshysy Erlan Dúısen.
Al óńirdegi elektr energııasyn taratýshy «Energosıstema» JShS-i 10,91 mlrd teńgeniń jumysyna suranys bermek. Sebebi jelilerdiń 75,96% tozyp tur.
Eske salsaq, byltyr elektr symyna muzdaq qatyp, aýyldarda jaryq óshti. Sol kezde óńirde shamamen 70 myń elektr baǵanasyn aýystyrý qajet ekeni aıtyldy.
