Aqtóbede sý tasqynynan zardap shekkender úshin áleýmettik komıssııa quryldy

Aqtóbe oblysy tótenshe jaǵdaılarǵa bıyl 1 mıllıard teńgeden astam qarjy bólgen. Ol qysta qar jınaý, kóktemde sý sorý jumystary men sý tasqynynyń aldyn alý, qutqarý jumystaryna jaratylyp  jatyr. Kómektiń bir bóligi osy. Al ekinshi kómek áleýmettik baǵytta. Búgin Aqtóbe qalasy ákiminiń orynbasarlary Lázzat Orazbaeva, Rýzııa Aıdasheva basqaratyn arnaıy komıssııa quryldy.

 

«Aqtóbede sý tasqyny kezinde zardap shekkenderge kómek kórsetý úshin jergilikti ákimdik pen qoǵamdyq uıym birikti.Komıssııa quramy aldyn ala bekitilgen. Olar: ardagerler men aqyl beretin aqsaqaldar, úkimettik emes uıym ókilderi men depýtattar, ártúrli partııa músheleri, stýdentter, blogerler, jýrnalıster. «Aqsha qaıda» dep esep suraıtyndar, ártúrli boljam aıtyp, senimsizdikpen qaraıtyndar bolady. Sondyqtan neǵurlym kóp bolsa, soǵurlym jaqsy. Jumys kóp, jumys kúshi aýadaı qajet»,- dedi qala ákiminiń orynbasary Lázzat Orazbaeva.

Aıta keteıik, komıssııa otyrysy kezinde ortaq esepshot ashyldy. Aqtóbedegi isker áıelder qaýymy kómektesýge daıyn. Al «Nur Otan» partııasynyń músheleri bir kúndik jalaqyny aýdarýǵa úndeý tastady. «Bul el basyna túsken qıyn kez. Biz qoldan keler kómekti berip, baspanasyz qalǵan adamdarǵa asarlatyp, qarjy jınaýymyz kerek. Partııa músheleri bir kúndik jalaqylaryn aýdarady. Óńirde 43 myńnan astam adam partııaǵa múshe. Bárine habarlandyrý berildi. Ózge adamdardy osy bastamany qoldaýǵa shaqyramyz»,- dedi «Nur Otan» partııasy qalalyq fılıaly tóraǵasynyń birinshi orynbasary Muratbaı Ájibaev. Komıssııanyń negizgi jumysy sý tartylyp, saıajaıdaǵy úılerge kirý múmkindigi berilgen kezde jandanady. Ázirge, zattaı, qarjylaı kómek bir jerge jınalady. Óıtkeni mektepterge ornalasqan adamdar qazir eriktiler men qaıyrymdy jandar tasyp jatqan kıim-keshek pen múlikti alǵanymen, ony qoıatyn jer tappaıdy.