Aqtóbede sý tasqynyna qarsy jedel shtab jumysy bastaldy
AQTÓBE. QazAqparat - Aqtóbe qalasynda sý tasqynyna qarsy jedel shtab jumysy bastaldy. Shtabtyń baılanys telefondary: 26-03-25, 24-95-97, dep habarlaıdy QazAqparat tilshisi.
Aqtóbede kóktemgi sý tasqynyn boldyrmaý úshin qalalyq jedel shtab jumysyn bastady. Sý tasqynyna qarsy shtab telefondary: 8(7132) 26-03-25, 24-95-97.
«Bıyl kóktemgi sý tasqyna qarsy is-sharalary úshin 110 assenızator, 10 avtotsısterna jáne 2 qozǵalmaly nasostyq stansa men pompa daıyndaldy. 25 aýyr tehnıka da bar. Onyń ishinde býldozer, kran, ekskavator, tıegish tehnıkalar jumyldyryldy. Sý tasqynyna qarsy 4 myń tonna ınertti materıal jáne 2,5 myń dana qum toltyrylǵan qapshyq daıyndaldy. Aqtóbe qalasy boıynsha 29 myń metrden astam ashyq, 4936 jabyq sýaǵar, 21 sý jınaıtyn úlken kólemdi qudyq, 42 drenajdy kishi qudyq bar. Naýryz aıynan bastap aryqtardy qardan tazartý jumystary júrgizilip jatyr. Qarasha aıynan bastap qalalyq polıgonǵa 270 myń sharshy metr qar shyǵaryldy. Qar shyǵarý jumystary jalǵasyp jatyr», - dedi Aqtóbe qala ákimi apparaty tótenshe jaǵdaılar bóliminiń basshysy Serik Dáýletov.
Shtabtan sý sorý nemese ınertti materıal túrinde járdem suraǵan turǵyndarǵa kómek sý tasqynyna qarsy komıssııasy tekserýinen soń ǵana beriledi.
Sondaı-aq kópqabatty úılerdiń aýlalaryna qyzmet kórsetetin uıymdar jaýap beredi.
