Aqtóbede sý tasqynyn aldyn alý jumystary túsindirildi
AQTÓBE. QazAqparat - Aqtóbe, Qarǵaly, Sazdy sý qoımalary bar bolǵany 28-49 paıyzǵa toldy, dep habarlaıdy QazAqparat tilshisi.
Búgin tótenshe jaǵdaıdar qyzmeti, sý qoımalarynyń basshylary Aqtóbe óńirlik kommýnıkatsııalar qyzmetinde sý tasqynynyń aldyn alý jumystaryn túsindirdi.
«Qazvodhoz» RMK dırektory Bekzat Nametovtyń aıtýynsha, sý qoımasy men tasqynǵa qarsy toptar birlese jumys istep jatyr.
«Aqtóbedegi iri sý qoımalarynda ótken jylǵy jaǵdaı qaıtalanbas úshin birneshe jumys atqaryldy. Aqtóbe sý qoımasynda 120 mıllıon tekshe metr sý bar. Ol 49 paıyzdy quraıdy. Al Qarǵaly sý qoımasynda 106 mıllıon tekshe metr sý bar. Bul bar bolǵany 38 paıyz ǵana. Sazdy sý qoımasynda 2,1 mıllıon tekshe metr sý bar. Jobalyq syıymdylyǵy boıynsha 28 paıyzdy qurap otyr. Bıyl sý az jınaldy. Sınoptıkterdiń boljamy boıynsha, Aqtóbe sý qoımasyna Elek ózeninen 70-130 mıllıon tekshe metr sý keledi dep kútilýde. Qarǵalyǵy 50-110 mıllıon tekshe metr sý kelýi múmkin. Boljam men naqty jaǵdaı saı kelse, iri sý qoımalarynan sýdy tómen aǵyzbaı, jınaımyz»,- dedi Bekzat Nametov.
Aqtóbe oblysy boıynsha 132 gıdrotehnıkalyq quraly bar. Olardyń 10-y eldi mekenderdi tasqyn sýdan qorǵaýǵa arnalǵan. Ózgesi mal, baý-baqshaǵa qajetti sý. Aýyldy sýdan qorǵaıtyn dambynyń altaýy Yrǵyz aýdanynda, ózgesi Alǵa, Qobda, Mártók aýdandarynda ornalasqan.
«Ótken jyly Yrǵyz aýdanyndaǵy 6 dambyny jóndeýge arnalǵan jobalyq-smetalyq qujat ázirlendi. Joba quny - 323 mıllıon teńge. Bıyl qarjynyń 30 paıyzy bólindi. Jyl sońyna deıin qarjy tolyq bólinip, dambylarǵa kúrdeli jóndeý júrgiziledi. Ózge dambylardyń jobalyq-smetalyq qujaty ázirlenip, 2019 jyly kúrdeli jóndeýden ótedi»,- dedi Aqtóbe oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Aqqul Nurjan.
