Aqtóbede sý tasqyny kezinde zardap shekken otbasy kúrkede turyp jatyr
AQTÓBE. QazAqparat - Aqtóbe qalasyndaǵy Mahambetovka baý-baqsha ujymynda turyp, sý tasqyny kezinde baspanasy qırap qalǵan Qyrqynbaevtardyń bireýine jerdi kásipker syıǵa tartý etti. Úı salýǵa qarjysy joq otbasy qazir temirden jasalǵan kúrkede turyp jatyr, dep habarlaıdy QazAqparat tilshisi.
Aqtóbe qalasyndaǵy sý tasqyny kezinde zardap shekkenderdiń bir bóligi qazir Qýraıly, Sazdy, Órleý aýyldarynda úı salyp jatyr. Jer telimi men qurylys materıaldaryn ıemdengen turǵyndar óz qarjysyn salyp, úıdiń aýmaǵyn keńeıtip jatyr. Kóbi qabyrǵasyn qalap, shatyryn bekitip aldy. Al keıbiri taıaýda ǵana jer alǵan. Bir aıdan soń kúz keletinin aıtyp, dabyl qaqqan turǵyndar qurylys materıaldaryn surap otyr.
«Úıimiz sýǵa ketip, qulap qalǵan soń kásipker kelip, ózi kottedj salamyn degen menshikti jerin syıǵa tartý etti. Oljas Janbolatovqa alǵysymyz sheksiz. Biraq biz qurylys materıalyn alatyn qarjy tappaı otyrmyz. Ákimdikke aryz jazyp, kómek suradym. Ózim Aqtóbe ferroqorytpa zaýytynda jumys isteımin. Kompanııa qıyrshyq tas, qum berip, qarjy bóldi. Úıdiń irgetasy jartylaı quıyldy»,- dedi úı ıesi Murambek Qyrqynbaev.
Bul otbasy týraly kóktemde QazAqparat jazǵan bolatyn.
Aqtóbe qalasyndaǵy №26 orta mektepti panalaǵan bir áýlettiń 17 adamy mektepti panalaǵan, páter jaldaý úshin olarǵa tek 30 myń teńge berilgen edi.
Balalary aýyryp, aýrýhanada uzaq emdelgen Qyrqynbaevtar aptap ystyqta avtobýstyń temir qańqasyna túneýge májbúr.
«Jaz kelip, kún ysyǵanymen ylǵaldy úıimizde tura almadyq. Balam jıi aýyrdy. Sóıtip Qýraılyǵa keldik. Munda jerimiz bar, qurylys materıalymyz joq. Ákimdikke jıi baryp shaǵymdanyp, kómek suradym. Keıde sharshap ketip, bul dúnıemen qoshtasqym keledi. Baý-baqsha ujymynda turatyn adamdar arasynda ondaı oqıǵalar da boldy. Qınalǵan kezde adam jan-jaqtan kómek suraıdy, yqylas tanytqan jan bolmasa túńilip ketedi eken. Bir aıdan soń kúz keledi. Qabyrǵasyn qalap, shatyryn bekitpesek qaıda baramyz?»,- dedi Gúlnazym Joldasova.
Bul otbasy aptap ystyqta temir kúrkeni panalap, keshkilik telefonnyń jaryǵymen tamaqtanady. Shybyn-shirkeı, masamen de kúrese almaıdy. Er adamdar jazda dalaǵa túnep júr. Qazirgi ýaqytta Aqtóbedegi sý tasqyny kezinde zardap shekkenderdi baqylaıtyn komıssııa Muratbek Qyrqynbaevtyń turmysymen tanysýǵa ketti.
«Aqtóbe qalasy ákiminiń orynbasary, komıssııa tóraǵasy Naǵymjan Aldııarov komıssııa múshelerine Qýraıly aýylyna baryp, Muratbek Qyrqynbaevpen kezdesýge, jaǵdaıdy jan-aqty bilýge barýǵa tapsyrma berdi. Oǵan «Qolqanat Aqtóbe» qoǵamdyq qoryna aryz jazyp, kómek suraýy qajet ekeni túsindirildi, Keıin qor komıssııasy sheshim shyǵarady»,- dedi Aqtóbe qalasy ákiminiń baspasóz hatshysy Larısa Tomchýk.
