Aqtóbede sý tasqyny kezinde birneshe aýylǵa qatynas shekteldi
AQTÓBE. QazAqparat - Aqtóbede Baıǵanın aýdanynyń birneshe aýylynda qatynas shekteldi. Sebebi joldy sý shaıyp ketti, dep habarlaıdy QazAqparat tilshisi.
Óńirde kún kúrt jylyp, arty jańbyr, qarǵa ulasty. Saldarynan qala kóshelerin sý basty.
Aqtóbe oblysy ákimi baspasóz qyzmetiniń habarlaýynsha, eki joldy sý shaıyp ketken. «6 naýryzdan 7 naýryzǵa qaraǵan túni «Qaraýylkeldi-Oımaýyt» avtojolynyń 63 shaqyrymynda jol shaıylyp, Mııaly, Oımaýyt jáne Dııar eldimekenderine baratyn tikeleı jol jabyldy. Erigen sý aǵyny tómendegen kezde qalpyna keltirý jumystary josparlanǵan. Aýyl turǵyndaryn azyq-túlik taýarlarymen qamtamasyz etý boıynsha sharalar qabyldandy. Jergilikti atqarýshy organdar men polıtsııa qyzmetkerleriniń kezekshiligi uıymdastyryldy. Sondaı-aq, 7 naýryz kúni tańerteń Baıǵanın aýdanynyń Noǵaıty aýylyna kireberis jol jartylaı shaıyldy. Noǵaıty eldimekenine jol qatynasy toqtatyldy. Munda joldyń jamylǵysyn nyǵaıtý jumystary júrgizilip jatyr. Dúkender shtattyq rejımde jumys istep tur, azyq-túlik qory jetkilikti. Eldimeken arqyly temirjol ótedi, Noǵaıty stansasy jaqyn ornalasqan. Jaǵdaı oblys ákimi Eraly Toǵjanovtyń jeke baqylaýynda»,-dep habarlady oblys ákiminiń baspasóz qyzmeti.
Sý tasqyny kezeńi bastalǵan sátten beri Aqtóbe qalasynyń, sondaı-aq oblystyń birneshe aýdanynyń turǵyndarynan 410 ótinim kelip tústi. Aqtóbe qalasynda osy kezeńde kelip túsken 295 ótinimniń 280-i pysyqtaldy. Táýlik boıy qala kóshelerinde 120-dan astam tehnıka jumys istep jatyr. Bir táýlikte 16 myń tekshe metrden astam sý soryldy, shamamen 2 shaqyrym aryq tazartyldy, 42 tekshe metr ınertti materıaldar ákelindi. Táýlik boıy qala kóshelerinde 120-dan astam tehnıka jumyldyrylǵan. Jalpy óńirde erigen qar sýyn sorý jumystaryna 500-den astam adam, 143 birlik tehnıka jáne 33 motopompa tartyldy.
