Aqtóbede sý tasqyny kezinde baspanasy qırap qalǵan adamdar taıaýda jańa úıge qonystanady
Aqtóbe oblysy Qobda aýdanynyń ortalyǵynda kóktemde ózen tasyp, aýylda 70-ten astam úı sý astynda qaldy. Munda tótenshe jaǵdaı jarııalanyp, turǵyndar ýaqytsha beketterge ornalastyryldy. Keıin munda QR Tótenshe jaǵdaılar mınıstri ıÝ.Ilın kelip, mán-jaımen tanysty. 24 úıdiń qurylysy bastalǵany da belgili boldy. Al búgin aýdanǵa óńir basshysy qurylys barysyn qarap shyqty. Barlyǵy 4 merdiger kompanııada 200-den astam jumysshy eńbek etip júr. Aýdany 100 sharshy metr bolatyn turǵyn úıdiń qabyrǵasy qalanyp, shatyry jabylǵan. Plastıkalyq terege salynyp, ishki árleý jumystary bastaldy.
«Barlyq kommýnıkatsııa júrgizildi. Qurylys materıaldary, jumys kúshi men arnaıy tehnıka jetkilikti, eshqandaı másele joq. Kún saıyn úı ıeleri kelip ketedi. Jumys kezinde olardyń talap-tilegi eskeriledi», - dedi «AiserStroyService» merdiger kompanııasynyń basshysy Aıdyn Esmuhanov.
Óz kezeginde turǵyndar oblys ákimine rızashylyǵyn bildirdi.
«Siz birde-bir sý tasqynynan zardap shekken turǵyn nazardan tys qalmaıdy jáne barlyǵy baspanamen qamtamasyz etiledi dep ýáde berdińiz. Ýáde oryndaldy, qoldaýyńyzǵa kóp rahmet. Bizdiń turǵyn úı alabymyzdy «Qobda sity» dep ataýdy usynamyz», - dedi aýyl turǵyny Nasıfa Aldrabekova.
Eraly Toǵjanovtyń aıtýynsha, úı qurylysy aıaqtalysymen munda jol salynady.
«Munda eki aıdan az ýaqyt ishinde búkil qala ósti. Qurylys qarqyny joǵary. Men úıdi salýǵa úlesin qosqandardyń barlyǵyna alǵys aıtamyn. Qurylys aıaqtalǵannan keıin merdigerler jol salýǵa kirisedi», - dep atap ótti oblys ákimi.
Aıta keteıik, kóktemgi sý tasqynyny boldyrmaý úshin munda uzyndyǵy 8 shaqyrym bolatyn bógettiń qurylysy da júrip jatyr.
