Aqtóbede sý tasqynynda qırap qalǵan aýyldyń turǵyndary aýdan ortalyǵyna kóshiriledi

AQTÓBE. KAZINFORM - Aqtóbe oblysy Oıyl aýdany Ekpetal aýylynyń turǵyndaryna úı aýdan ortalyǵynan salynady.

Sý tasqyny kezinde Sh.Bersıev atyndaǵy aýyldyq okrýgke qarasty Qaratal aýyly, Oıyl aýyldyq okrýgine qarasty Ekpetal aýylynda úılerge sý kirdi. Saldarynan Ekpetal aýylynda úıler qırap qaldy. Aýdan ortalyǵynan 5 shaqyrym qashyqtyqta ornalasqan aýyl halqy endi Oıyldyń ózine qonystanady.

«Ekpetal aýyly oıpań jerde ornalasqan. Sý ketkende aýyl turǵyndary evakýatsııalanyp, aýdan ortalyǵyna kóshirildi. Ekpetal aýyly turǵyndaryna úıdi endi Oıyl aýylynan salýdy josparlap otyrmyz. Turǵyndarmen kezdesý ótti. Olar óz kelisimin berip otyr. Turǵyn úı salý úshin 482 - 690 ýchaskeleri aralyǵyndaǵy aýmaqta bos oryndar bar. Turǵyn úı salýǵa arnalǵan ınfraqurylym, ıaǵnı gaz, sý tolyq júrgizilgen. Ekpetal aýyly turǵyndaryna osy ýchaskelerde turǵyn úı salý josparlanyp otyrmyz», - dedi Oıyl aýdanynyń ákimi Asqar Qazybaev.

Oıyldyń jańa turǵyn úı alabynda 1500 oryndy mektep, 90 oryndyq balabaqsha salýǵa arnalǵan jer telimi de qarastyrylǵan.

Aıta keteıik, Oıyl aýdanynda 29-naýryz kúni tótenshe jaǵdaı jarııalandy. Munda qazir sý, jaryqsyz qalǵan úılerdi qalpyna keltirý jumysy júrip jatyr.