Aqtóbede sý tasqynynan zardap shekkenderge mıllıard teńgege jýyq birjolǵy tólem aýdaryldy

AQTÓBE. KAZINFORM – Aqtóbe oblysy boıynsha 2904 otbasy birjolǵy tólemdi aldy. Al 530 mln teńgege jýyq qarjy 242 otbasyna bólindi. Bul baspanany jóndeýge arnalǵan aqsha.

Aqtóbe oblysy boıynsha búginge deıin 2904 otbasydan birjolǵy tólemge ótinish túsip, sý tasqynyna baılanysty bári 100 AEK kóleminde nemese 300 myń teńge aqsha aldy. Bul degenimiz 939 mln teńgeden astam qarjy. Eger taǵy da ótinish tússe, komıssııa qarap, qarjy aýdarady. Al 130 mln teńgeden astam qarjy 331 otbasyna materıaldyq kómek retinde aýdaryldy. 

Aqtóbe oblysy ákiminiń baspasóz qyzmetiniń habarlaýynsha, búginde oblys boıynsha 4678 úıge sý kirgen bolyp esepteledi. Onyń 1447-i turǵyn úı bolsa, ózgesi saıajaı aýmaǵyndaǵy baspana. Arnaıy komıssııa búginde onyń myńnan astamyn tekserip, basym bóligine baǵalaý júrgizdi. 

— Qazirgi kezde 242 otbasy úıdi qalpyna keltirý úshin 527 mln teńgeden astam qarjy aldy. Baspanasy turýǵa jaramsyz bolyp qalǵan 13 otbasy daıyn úıdi satyp alýǵa kelisim berdi. Olarǵa 174 mln teńge jumsaldy. Sonymen birge qazirgi kezde 97 úıdiń qurylysy bastaldy, — dep habarlady Aqtóbe oblysy ákiminiń baspasóz qyzmeti. 

Aıta keteıik, Aqtóbe oblysy boıynsha Yrǵyz aýdanynda ǵana tasqynǵa qarsy kúres jumysy júrip jatyr. Yrǵyzdaǵy Quılys jáne Jaısańbaı aýyldarynda jaǵany bekitý úshin tótenshe jaǵdaılar qyzmetimen qatar aýyl turǵyndary jumyldyrylǵan. Bul jumystardyń júrip jatqanyna bir aıdan astam ýaqyt ótti.