Aqtóbede sý tasqynynan zardap shekken turǵyndarǵa zańgerler tegin keńes berdi
AQTÓBE. KAZINFORM — Aqtóbe qalasyndaǵy jataqhanalarǵa qonystanǵan turǵyndarǵa bank qyzmetkerlerimen birge zańgerler de keńes berip júr. Turǵyndardyń kóbi materıaldyq shyǵyndy esepteý tetigin surady.
Aqtóbe qalasy boıynsha barlyǵy 7 evakýatsııalyq pýnkt bar.
Qazir bári joǵary jáne arnaýly oqý oryndarynyń jataqhanasynda ornalasqan.
Munda oblystyq qoǵamdyq shtab ókilderi kúnde baryp, turǵyndardyń hal-jaǵdaıyn biledi.
Sonymen birge arnaıy mamandar da kezdesý ótkizip júr.
M.Ospanov atyndaǵy Batys Qazaqstan medıtsına ýnıversıtetiniń jataqhanasynda zańger Ásel Áıtekova men Muhtar Myrzash turǵyndarǵa birrettik ótemaqyny alý, sýǵa ketken úılerdiń qujattaryn retteý jáne materıaldyq shyǵyndy esepteý jolyn túsindirdi.
Ásel Áıtekovanyń aıtýynsha, qazir arnaıy komıssııalar sý basqan úılerdi tekserip, turǵyndardyń dúnıe-múlkin baǵalap jatyr.
Osy tusta kóp másele kezigedi.
— Birinde úıiniń qujaty durys bolmasa, endi bir adam sýǵa ketken úıdi páter retinde jaldap turǵan. Páter ıesimen arada kelisimshart joq. Taǵy bir otbasy bir aýlada eki úı salǵan, al qujat tek bireýinde ǵana bar. Osyndaı jaǵdaılarda turǵyndar qıyndyqtarǵa tap boldy. Eger komıssııa sheshimimen kelispese, aryz jazýyna quqyǵy bar. Degenmen qolynda zańdy qujaty bolýǵa tıis. Al birjolǵy ótemaqy almaǵan otbasylar óz aýmaǵyndaǵy ákimdikke ótinish jazýy kerek. Kezekpen olarǵa ótemaqy tólenedi, — dedi zańger Ásel Áıtekova.
Óńirde aqparattyq-túsindirme jumystary jalǵasyp jatyr.
Oǵan qoǵamdyq shtab músheleri jumyldyrylǵan.
