Aqtóbede sý tasqynynan zardap shekken aýyldyń bitirýshi túlekteri qalada oqyp júr
AQTÓBE. KAZINFORM – Aqtóbede 22 mekteptiń balalary qashyqtan oqyp júr. Al Oıyl aýdany Bersıev orta mektebiniń bitirýshi túlekteri qaladaǵy lıtseı-ınternatqa ornalastyryldy.
Aqtóbe oblysy boıynsha 22 mekteptiń balalary qashyqtan oqyp júr. Sebebi óńirde 20 bilim ordasy evakýatsııalyq pýnkt retinde jumys istep tur. Onyń 17-i mektep, 2-i kolledj jáne bireýi mektep janyndaǵy ınternat.
- Sý tasqynynan zardap shekken adamdar ornalasqan 17 mektep, sý tasqynynan zardap shekken eki bilim berý uıymy qashyqtan, sý tasqyny kezinde jol qatynasy ishinara úzilgen Áıteke bı aýdanyndaǵy Áıke mektebiniń balalary aralas formatta oqyp júr. Al sý tasqynynan zardap shekken Oıyl aýdany Bersıev orta mektebiniń 17 oqýshysy oblys ortalyǵyndaǵy M.Qusaıynov atyndaǵy mektep-ınternatqa ornalastyryldy. Balalardyń emtıhanǵa, UBT daıyndalýyna bar jaǵdaı jasaldy, - dedi Aqtóbe oblystyq Bilim berý basqarmasy basshysynyń orynbasary Nurgúl Bertileýova.
Bersıev orta mektebiniń bitirýshi túlekteri arasynda bes oqýshy Altyn belgiden úmitti. Sondyqtan olardyń oqyp, UBT daıyndalýyn M. Qusaıynov atyndaǵy daryndy balalarǵa arnalǵan mektep-ınternattyń ujymy óz mindetine aldy.
- Mektep lıtseı-ınternat bolǵan soń balalardyń jatyn orny, tamaǵy tolyq qarastyrylǵan. Sonymen birge oqýshylardyń tańdaý pánine sáıkes UBT-ǵa daıyndyq kúsheıdi. Synyp kýratory men tárbıeshi bekitildi, - dedi M. Qusaıynov atyndaǵy oblystyq daryndy balalarǵa arnalǵan mamandandyrylǵan lıtseı-ınternatynyń dırektory Tólegen Aımuqatov.
