Aqtóbede sý tasqyny kezinde buzylǵan úılerdi súrý jumysy áli bastalmady

AQTÓBE. KAZINFORM – Aqtóbede byltyrǵy sý tasqyny kezinde buzylǵan, jaramsyz bolǵan úıler bıyl súrilýi tıis. Áli kúnge deıin merdiger anyqtalmaı jatyr.

Aqtóbe qalalyq ákimdigi sý tasqyny kezinde apatty dep tanylǵan úılerdiń bárin súrip, ornyn tazalaýǵa sheshim qabyldady. Memlekettik satyp alý konkýrsy ótkenimen, merdigerler bir-birine shaǵym túsirip, ýaqyt sozyp jatyr.

– Sý tasqyny saldarynan jaramsyz dep tanylǵan úılerdi súrý, ornyn tazalaý jumystaryn júrgizýmen aınalysatyn merdiger uıymdy anyqtaý úshin Almaty aýdanynyń ákimdigi «Memlekettik satyp alý týraly» zańnamasyna sáıkes eki ret konkýrs jarııalady. Ekeýiniń de qorytyndysy merdigerdi anyqtaı almady. Birinshisinde merdiger bolýǵa úmitker uıymdardyń tapsyrǵan qujattary tolyq bolmaı, konkýrstyń talabynan ótpeı qaldy. Ekinshisinde konkýrs arqyly jeńimpaz dep tanylǵan merdigerdiń ústinen utylǵan merdiger aryz túsirdi. Bir-biriniń ústinen aryz jazǵan jaǵdaıda konkýrstyń nátıjesi joıylady. Endi Almaty aýdanynyń ákimdigi úshinshi qaıtara konkýrs jarııalady. Onyń qorytyndysy kelesi aptada shyǵýy kerek. Merdiger anyqtalǵan jaǵdaıda birden jumysqa kirisedi. Ol jumystar úshin Almaty aýdanynyń ákimdigi 264 mln teńge qarastyryp otyr, - dep habarlady Aqtóbe qalasy ákiminiń baspasóz hatshysy Aıgúl Baımenova.

Buǵan deıin habarlaǵanymyzdaı, Aqtóbe qalasynda sý tasqyny kezinde 191 úı apatty dep tanyldy. Endi bul jerler memlekettiń menshigi.