Aqtóbede sý tasqyny kezinde buzylǵan Şerbakov bógeti qaıta jańartylady
AQTÓBE. KAZINFORM - Aqtóbe oblysy Áıteke bı aýdanyndaǵy Şerbakov bógetin qaıta jańǵyrtý úshin joba ázirlenedi.
Kóktemgi sý tasqyny kezinde buzylǵan bóget qazir jaramsyz kúıde tur. Al bógetti jóndegen merdiger kompanııaǵa qatysty qylmystyq is qozǵalyp, tergeý júrip jatyr.
Aqtóbe oblysynyń ákimi Ashat Shaharov Áıteke bı aýdanyna jumys saparymen baryp, aýdan basshylyǵy jáne tıisti memlekettik basqarmalarmen gıdrotehnıkalyq qurylymdy jóndeý máselelerin talqylady. Oblys ákimi rezervtik syıymdylyqtyń kólemin ulǵaıtýdy, sý aıdynynyń aınalasyna jańa shlıýzder men sý beketterin ornatýdy, sondaı-aq túbin tazartý men tereńdetýdi eskere otyryp, qaıta joba ázirleýdi tapsyrdy.
Aıta keteıik, «Şerbakov» bógeti Áıteke bı aýdany Taldysaı aýylynan bes shaqyrym qashyqta ornalasqan. Jarty ǵasyr boıy munda sý jınalyp, sýarmaly egin sharýashylyǵyna, mal sýarý jáne jaıylymǵa sý jiberýge paıdalanyldy. Jalpy syıymdylyǵy - 300 myń tekshe metr.
Bógettiń uzyndyǵy 500 metrden asady. Qurylymnyń bıiktigi 6-8 metrge jetedi. Eni - 8 metr. Bóget - Aqtóbe oblysynyń Tabıǵı resýrstar jáne tabıǵat paıdalanýdy retteý basqarmasynyń teńgeriminde.
- Aýdanda tótenshe jaǵdaı jarııalanyp tur. Sondyqtan qaıta joba jasaý kerek. Gıdrotehnıkalyq qurylǵyny barlyq tehnıkalyq talapqa saı qaıta jobalap, shlıýzder de qarastyrylýy tıis. Al joǵaryǵa gıdrobeket ornatý qajet, - dedi Aqtóbe oblysynyń ákimi Ashat Shaharov.
Eske salsaq, bóget buzylǵan soń Taldysaı jáne T.Júrgenov aýyldarynda adamdar evakýatsııalandy.
