Aqtóbede sý shaıýy múmkin respýblıkalyq joldarda bekitý jumysy júrip jatyr

AQTÓBE. KAZINFORM - Aqtóbedegi respýblıkalyq tasjoldarda sý basý qaýpi basym 6 ýchaske bar. Onda táýlik boıy kezekshilik bolady.

Aqtóbe oblysy boıynsha 36 eldimeken sý basý qaýpi basym aýmaqta ornalasqan. Onyń altaýy respýblıkalyq mańyzy bar tasjolǵa jaqyn. «QazAvtoJol» AQ oblystyq fılıaly aqpanda tasqyndy boldyrmaý jumysyn bastady. Qazirgi kezde qaýpi basym aýmaqqa ınertti materıaldar tasymaldanǵan.

— Sý tasqyny kezeńine 800 tonna qum aralas tas, 300 tonna qıyrshyq tas, 2 000 tonna qum men 25 myń qap daıyndaldy. Sý tasqyny kezeńinde respýblıkalyq mańyzy bar tasjoldaǵy 6 ýchaskede kezekshi brıagada táýlik boıy kúzet júrgizedi. Eger sý ótkizý júıesindegi jumys qıyndasa, joldy ınertti materıaldarmen bekitemiz, - dedi «KAJ servıs» JShS AOF bólim basshysy Núrken Aıtmaǵambetov. 

Qazirgi kezde kópir astyndaǵy sý ótkizý qubyrlary men onyń aýmaǵy qardan tazartylyp jatyr. Kún saıyn jumysqa 400 adam men 117 tehnıka jumyldyrylady. Barlyq ınetti materıal 16 jol-paıdalaný beketine teńdeı bólinedi. Bul qajet kezde materıaldy der kezinde jetkizýge múmkindik beredi.

Aıta keteıik, ár jol-paıdalaný beketinde sheber, mehanızator jáne jumysshylar bolady. Olar tehnıkamen jabdyqtalǵan. Sınoptıkterdiń aıtýynsha, naýryz aıynda óńirde jańbyr jaýyp, aýa temperatýrasy +2oS gradýs bolady.