Aqtóbede sý shaıǵan ótkel nyǵaıtylyp, birer saǵatta qaıta buzyldy

AQTÓBE. KAZINFORM - Oıyl aýdanyna kireberistegi ótkelde kólik qatynasy keshkilik jandanǵanymen, qaıta buzyldy.

Aqtóbe oblysy ákimi baspasóz qyzmetiniń habarlaýynsha, ótkeldi qalpyna keltirý kezinde qubyr salyndy, qum toly qap tóseldi. Keshki saǵat 17:30 shamasynda kólikter arǵy betke ótkenimen, birer saǵatta qaıta buzyldy.

- Sý deńgeıi tómendeıdi, sosyn qaıta qalpyna keltirý jumystary júrgiziledi, - dep habarlady Aqtóbe oblysy ákiminiń baspasóz qyzmeti.

Al TJD baspasóz qyzmetiniń habarlaýynsha, jaǵdaı tolyq rettelgenshe qutqarýshylar, áskerı bólim qyzmetkerleri sol jaqta bolady.

Búgin Aqtóbe oblysy ákimdiginde sý tasqynyna qarsy shtab otyrysy ótti.

Oblystyq TJD bastyǵynyń orynbasary Aıbat Jańabergenovtiń málimetine sáıkes, oblys ortalyǵy men birneshe aýdanda ózenderdiń qaýipti aýmaqtarynda júrgizilgen muz jarý jumystary aıaqtaldy. Erigen qar sýlaryn sorý, qar shyǵarý, sý arnalaryn keńeıtý, aryqtar men sý ótkizgish qubyrlardy tazartý jumystary áli de jalǵasyp jatyr.

Aıta keteıik, sınoptıkter kún jylyna túsetinin habarlady.

- Aýa raıy boljamyna sáıkes, aldaǵy úsh kúnde synap baǵany 16 gradýsqa deıin kúrt joǵarylaıdy. Sondyqtan daıyndyq sharalaryn meılinshe kúsheıtý qajet. Barlyq kúsh-jiger sý tasqynynyń aldyn alý sharalaryna baǵyttalýy tıis. Aýla aýmaqtary men jol jıekterinen qar shyǵarý jáne sý aıdaý jumystaryn jedeldetý kerek, drenajdyq júıeler men arnalardy baqylap, olardyń tolyp ketpeýin jáne bitelip qalmaýyn ýaqytyly baqylap otyrý qajet. Árbir jaýapty basshy osy is-sharalardyń ýaqytyly oryndalýyna tikeleı jaýapty bolady. Halyqty jáne ınfraqurylymdy sý tasqynynan qorǵaý máselesi eń basty mindet bolyp qalýy tıis», - dep óńir basshysy Ashat Shaharov.

Aıta keteıik, búgin Oıylda ótkeldi sý shaıyp, qatynas ýaqytsha toqtady.

Aýdanǵa TJD qosymsha kúsh jiberildi.