Aqtóbede sý basý qaýpi basym 38 eldi meken bar
AQTÓBE. QazAqparat - Aqtóbede sý tasqynynyń aldyn alý jumystary bastaldy. Oblys boıynsha 38 eldi meken sý basý qaýpi basym aýmaqta ornalasqan. Onda 13 myńnan astam adam turady, dep habarlaıdy QazAqparat tilshisi.
Aqtóbe oblysynda úsh úlken sý qoımasy bar. Qarǵaly, Sazdy, Aqtóbe sý qoımalary qazir baqylaýǵa alyndy. Oblystyq tótenshe jaǵdaılar basqarmasy alǵashqy jıyndy ótkizip, kóktemgi sý tasqynyna daıyndyq jumystaryn pysyqtady.
«Sý basý qaýpi basym aýyldar jyl saıyn anyqtalady. Bıyl 38 eldi meken baqylaýǵa alyndy. Onda 13 myńnan astam adam turady. Eger tótenshe jaǵdaı tirkelse, turǵyndardy kóshirýge 87 beket daıyn. Sınoptıkterdiń boljamy boıynsha, aqpan aıynda jaýyn-shashyn mólsheri qalypty normadan aspaıdy. Al naýryz aıynda kún jylyp, kóktem erte kelýi múmkin»,- dedi oblystyq TJD bólim bastyǵy Qumar Turmaǵambetov.
Aıta keteıik, qys aılarynda Aqtóbe qalasy men aýdandardan 400 myń tekshe metrden astam qar shyǵaryldy. Tasqynnyń aldyn alý maqsatynda tótenshe jaǵdaılar departamenti men jergilikti ákimdik janar-jaǵarmaı jáne ınertti materıaldardy daıyndap jatyr.
