Aqtóbede stýdentterge ájethana jýǵyzbaq bolǵan oqytýshy jazalandy
AQTÓBE. QazAqparat - Aqtóbede stýdentter ájethana jýýdan bas tartyp, bul oqıǵa qoǵamda rezonans týǵyzdy. Osy jaǵdaıǵa baılanysty tekserý komıssııasynyń qorytyndysy shyqty, dep habarlaıdy QazAqparat tilshisi.
Marat Ospanov atyndaǵy Batys Qazaqstan memlekettik medıtsına ýnıversıtetindegi shý áleýmettik jelide keńinen talqylandy. Stomatologııa bólimindegi stýdentter ájethanany tazartýǵa májbúr bolǵan. Osy oqıǵadan keıin qyzmettik tekserý júrgizilip, nátıjesinde meńgerýshi Raısa Orazǵa sógis berildi.
«Ýnıversıtet ákimshiligi stýdent pen ınternatýra stomatologııasy men joǵary oqý ornynan keıingi bilim berý kafedrasynyń meńgerýshisi Raısa Orazdyń arasynda bolǵan oqıǵa boıynsha tekserý júrgizdi. Alǵashynda R.Oraz statsıonarlyq em alyp júrdi, sondyqtan komıssııa otyrysy keıinge shegerildi. Tekserýden soń R.Orazǵa óz laýazymdyq ókilettigin asyra qoldanǵany úshin sógis túrindegi tártiptik jaza qoldanyldy. Sonymen qatar, R.Orazdyń ótinishi boıynsha ol kafedra meńgerýshisi qyzmetinen bosatyldy. Qazir ol kafedranyń professory mindetin atqarýshy laýazymynda júr. Bul qyzmetke konkýrs arqyly ǵana ótedi», - dedi ýnıversıtettiń ákimshilik-kadrlyq jumystar jónindegi departamenttiń jetekshisi Dınara Nuranova.
Onyń aıtýynsha, senbilik uıymdastyrý R.Orazdyń mindetine kirmeıdi, biraq ol sol kúni stýdentterge ótinish aıtqan.
Aıta keteıik, komıssııa quramynda ýnıversıtet prorekory, oqytýshylar men belsendi stýdentter, psıhologtar men kadr bólimi boldy.
Qazirgi ýaqytta Raısa Oraz stýdentterden emtıhan qabyldap jatyr. Ýnıversıtettiń ınternatýra stomatologııasy men joǵary oqý ornynan keıingi bilim berý kafedrasy sol joǵary oqý ornynyń emhanasy ornalasqan ǵımaratta eken. Al emhana jetekshisi Raısa Orazdyń balasy Azamat Omarǵalı bolyp shyqty.
«Bul jer - Marat Ospanov atyndaǵy BQMMÝ stomatologııa emhanasy. Men osy emdeý ornyna jetekshilik etemin. Ol - meniń anam, basqa eshteńe aıta almaımyn. Bárine kafedra basshylyǵy jaýap beredi», - dedi emhana jetekshisi Azamat Omarǵalı.
