Aqtóbede stýdentterdi tegin tamaqtandyratyn dəmhana ashyldy
AQTÓBE. QazAqparat - Aqtóbelik kásipker Erbol Baıjarqynov stýdentterdi tegin tamaqtandyryp jatyr, dep habarlaıdy QazAqparat tilshisi.
Búgin Aqtóbede «Qazaq» ashanasy ashyldy. Munda stýdenttik bılet arqyly tegin tamaqtanýǵa bolady. As mázirinde sorpa, etti makaron, shaı men qant, nan bar.
«Ózim Marat Ospanov atyndaǵy Batys Qazaqstan memlekettik medıtsınalyq ýnıversıtetiniń ІІ kýrs stýdentimen. Qyzylorda oblysynan kelip oqyp jatyrmyn. Jańa ashananyń ashylǵany týraly aqparatty áleýmettik jeli arqyly estidim. Bul biz úshin jaqsy jańalyq boldy. Endi ashanaǵa jıi kelip, tamaqtanamyz», - dedi stýdent Berdibek Amanbek.
Kásipker kúnine 100 stýdentke tegin tamaq ázirlep beredi. Aspazdar túske deıin, tústen keıin eki ret tamaq pisiredi. Barlyǵy eki aspaz, eki qamyr ıleýshi men eden jýýshy eńbek etedi. Daıashylar da jumys isteıdi.
«Stýdentterge arnalǵan ashanada bes túrli taǵam tegin. Al ózge adamdarǵa bári aqyly bolady. Ashana 8 saǵat jumys isteıdi. Ashylǵan alǵashqy eki saǵatta 60-tan astam adam kelip, as ishti. Bárine aldyn ala habar berildi. Joǵary oqý oryndaryna aqparattyq qaǵaz taratyldy», - dedi ashana ákimshisi Aqmarjan Úmbetova.
Aıta keteıik, bul ashanada ár senbi saıyn stýdentter jergilikti kásipkerlermen kezdesip, olardan bıznesti bastaý jolyn úırene alady. «Óz tájirıbeńmen bólis!» atty kezdesý de tegin ótedi.
