Aqtóbede stýdentter tóbelesip, bir adam pyshaq jaraqatymen aýrýhanaǵa tústi

AQTÓBE. QazAqparat – Aqtóbede kolledj ben ýnıversıtet stýdenti tóbelesip, biri ekinshisine pyshaq suǵyp aldy, dep habarlaıdy QazAqparat tilshisi.

Qylmystyq oqıǵa 3 naýryz kúni tirkeldi. Oblystyq jedel járdem aýrýhanasyna 21 jastaǵy stýdent tústi. Ol pyshaqtan jaraqat alǵan.

«Saqtaǵan Báıishev ýnıversıteti men Aqtóbe baılanys jáne elektrotehnıka kolledjiniń stýdentteri tóbelesip, biri jaralandy. Oqıǵa ornyna jedel tergeý toby jetti. Biri 2 kýrs, ekinshisi 3 kýrs stýdenti. Kúdikti ustaldy. Qazir Qylmystyq kodekstiń «Adam óltirýge oqtalý» baby boıynsha is qozǵalyp, tergeý bastaldy. Osy oqıǵadan soń oblystyq PD bastyǵynyń birinshi orynbasary Qanat Álıev stýdenttermen kezdesý ótkizdi», - dep habarlady oblystyq PD baspasóz qyzmetiniń jetekshisi Erbolat Sarqulov.

Aıta keteıik, jyl basynan beri kámeletke tolmaǵan jasóspirimder 7 urlyq, 5 buzaqylyq, 4 tonaý, 2 alaıaqtyq qylmys jasady. Barlyǵy 29 jasóspirim qylmystyq jaýapqa tartylǵan.

«Ótken aıda Aqtóbe baılanys jáne elektrotehnıka kolledjine kelip, qylmystyń aldyn alý jaıyn, zańda qarastyrylǵan jaza týraly aıtqan bolatynbyz. Biraq jastar bile tura taǵy qylmys jasady», - dedi oblystyq PD bastyǵynyń birinshi orynbasary Qanat Álıev.

Aldaǵy ýaqytta oqý orny kóp shoǵyrlanǵan bul aýmaqqa beınebaqylaý kameralaryn ornatpaq.