Aqtóbede stýdentten aqsha bopsalaǵan jasóspirim ustaldy
AQTÓBE. QazAqparat – Aqtóbeniń ortalyq kóshesinde belgisiz bireý jasóspirimniń 7 myń teńge aqshasyn alyp ketken. Kúdikti ustaldy, dep habarlaıdy QazAqparat tilshisi.
«Qoblandy batyr atyndaǵy ortalyq stadıonnyń janynda belgisiz bireý kolledj stýdentin bopsalaǵan. Urǵan, jaraqattaǵan. Onyń 7 myń teńgesin alyp ketken. Naqtyraq aıtqanda, jábirlenýshi aqshany ekinshi deńgeıdegi bankterdiń biriniń onlaın qosymshasy arqyly aýdarǵan. Al 7 qyrkúıek kúni jábirlenýshiniń ákesi polıtsııaǵa júgindi», - dedi oblystyq PD baspasóz qyzmetiniń jetekshisi Erbolat Sarqulov.
Jedel izdestirý is-sharasy barysynda 16 jastaǵy kúdikti anyqtaldy. Sotqa deıingi tergeý bastaldy. Jábirlenýshi men kúdikti kámelet jasqa tolmaǵan, ekeýi de ata-analaryna berildi.
