Aqtóbede stýdent-jastardyń talap-tilekteri qarastyrylýda

AQTÓBE. QazAqparat – Aqtóbede joǵary oqý oryndary men mekemelerdiń jastar isi jónindegi komıtet tóraǵalary kezdesý ótkizdi. Onda jastar arasyndaǵy negizgi máseleler aıqyndalyp, birlesken shara ótkizý jospary quryldy, dep habarlaıdy QazAqparat tilshisi.

Aqtóbe jastary bir ortada bas qosyp, aldaǵy josparlarymen bólisti. Qazirgi kezde oblystyq Jastar resýrstyq ortalyǵy qaladaǵy joǵary oqý oryndarynyń jataqhanalaryn aralap, stýdenttermen kezdesip júr.

«Jataqhanada jatatyn jastarmen kezdesip, oblystaǵy jastar saıasatyn túsindirip júrmiz. Aldymen, Jubanov atyndaǵy óńirlik ýnıversıtetten bastadyq. Ár aptanyń beısenbi kúni ótetin kezdesý ári qaraı da jalǵasady. Biz úshin olardyń usynysy, kezikken problemalary mańyzdy. Jastar kóbine jataqhanadaǵy turmystyq tehnıka, ınternet tartý joly, jattyǵý zalymen qamtý jóninde aıtty. Bárin oqý ornynyń basshylaryna jetkizemiz, onyń sheshý joldaryn qarastyramyz. Buryn máselen tazartylǵan aýyz sý satatyn arnaıy qurylǵy dúkenderde bolsa, qazir jataqhana ishine qondyrylǵan. Osy retpen túıin tarqap jatyr», - dedi oblystyq Jastar resýrstyq ortalyǵynyń basshysy Nurlybek Mýsın.

Sonymen birge aýdan, aýyldarda da jastarǵa arnalǵan memlekettik baǵdarlama túsindiriledi. Ásirese «Jasyl el», «Serpin» baǵdarlamalary men qaıtarymsyz grant alý, oblys ákiminiń bilim granty týraly aıtylýda.

«Stýdentter ózin qoǵam múshesi retinde sezine bilýi tıis. Adamı kapıtal sapasyn arttyrý maqsatynda olardyń kópshilik arasyna jıi shyǵýyn uıymdastyra bilý mańyzdy. Sporttyq salada jetistikterge jetip, jaqsy úlgi kórsetip júrgen jastardy úlgi tutamyz. Máselen, AQSh-ta bilim alyp júrgen jerlesimizben kezdesý ótkizdik. Ol bizge shetelde bilim alý joly men tájirıbe jınaý úlgisin aıtyp berdi. Sportta jetistikke jetken maqtanyshtarymyz da kezdesý ótkizdi. Munyń bári jastarǵa serpin, kúsh beredi», - dedi Báıishev ýnıversıtetiniń jastar isi jónindegi komıtet tóraǵasy Aǵysbaı Jarasqan.