Aqtóbede stýdent óz-ózine qol jumsady

Aqtóbedegi joǵarǵy oqý ornynyń 1-kýrs stýdenti óz-ózine qol jumsady. Qazirgi kezde sýıtsıdtiń sebebi anyqtalyp jatyr, dep habarlaıdy Kazinform.

Oqıǵa 25-qarasha kúni bolǵan. Aqtóbe qalasy Polıtsııa basqarmasy №1 qalalyq polıtsııa bóliminiń kezekshi bólimine aǵaıyndy Jubanovtar kóshesinde ornalasqan kópqabatty úıdiń 9-qabatyndaǵy balkonnan jas jigittiń máıiti tabylǵany týraly habarlama kelip túsken. 

- Oqıǵa ornyna barǵan jedel-tergeý toby qaladaǵy joǵarǵy oqý oryndarynyń birinde oqıtyn 20 jastaǵy jigittiń máıitin tapty. Jas jigittiń óz-ózine qol jumsaǵany anyqtaldy. Sýıtsıdtiń sebepteri anyqtalýda, - dep habarlady oblystyq PD baspasóz qyzmeti.

Stýdent Q. Jubanov atyndaǵy Aqtóbe óńirlik ýnıversıtetinde oqyǵan. 

- Qaladaǵy kópqabatty úılerdiń birinde ýnıversıtet stýdentiniń biri ózine qol jumsaǵany belgili boldy. Bul - ýnıversıtet ujymy úshin úlken qaıǵy. Jaqyndary men otbasyna qaıǵyryp kóńil aıtamyz. Qazir oqıǵa boıynsha polıtsııa departamenti tergeý júrgizip jatyr. Ýnıversıtet tergeýge tolyq kómek kórsetedi. Ol belsendi stýdentterdiń biri boldy, sabaqta ozat, qurdastaryna syıly bolatyn. Oqýy men tártibine qatysty shaǵym bolǵan emes. Birinshi semestr boıynsha sabaqtaryn úzdik aıaqtap, qorytyndy emtıhandarǵa joldama alǵan, - dep habarlady Q.Jubanov atyndaǵy Aqtóbe óńirlik ýnıversıtetiniń baspasóz hatshysy Ásel Baqbergenova. 

Eske salsaq, taıaýda atalǵan joǵarǵy oqý ornynyń bir stýdenti kóz jumdy. Ol da óz-ózine qol jumsaǵan.