Aqtóbede stýdent ólimine qatysty sot otyrysy jalǵasyp jatyr
AQTÓBE. KAZINFORM — Kelesi sot otyrysynda sottalýshy Mádı Súgirbaıdan jaýap alynady. Búgin jataqhanada turatyn kolledj stýdentteri kýágerlik etti.
Aqtóbe qalalyq № 2 sotynda 17 jastaǵy Nurbaqyt Baqyttyń ólimine qatysty is qaralyp jatyr. Sottalýshy Mádı Súgirbaıǵa Qylmystyq kodekstiń «Qaýipti jaǵdaıda qaldyrý» jáne «Densaýlyqqa qasaqana aýyr zııan keltirý» baptary boıynsha aıyp taǵyldy.
Іs materıalyna súıensek, oqıǵa bıyl sáýir aıynda boldy. Aqtóbe kólik, kommýnıkatsııa jáne jańa tehnologııalar kolledjiniń jataqhanasynda jatatyn 4-kýrs stýdenti Mádı Súgirbaı ózinen kishi stýdentterden tamaq suraıdy. Jataqhana ishinde isher as bolmaǵan soń dúkennen alyp kelýge jumsaıdy. Bul úshin bólme ishinde bolǵan balalar tósek jamylǵysyn bir-birine baılap, Nurbaqyt Baqytty tómen túsiredi. Al Mádı Súgirbaı oǵan 2 000 teńge aqsha berdi. Sot otyrysynda kýáger bolǵan stýdentter jataqhana esigi saǵat 21:00–de jabylatynyn, tipti ortaq esik syrttan qulyptalatynyn aıtty. Sondyqtan stýdentter dúkenge barý úshin tósek jamylǵysyn paıdalanǵan. Sol sátte Nurbaqyt Baqyt qulap, eki aıǵa jýyq em qabyldap, kóz jumdy.
— Men jattyǵýǵa qatysamyn. Jattyǵýǵa baryp kelip, jataqhanadaǵy bólmeme kirdim. Saǵat 20:00 shamasynda kirgen kezde ornymda ózge stýdent jatty. Janyna uıyqtap qaldym. Saǵat 23:00 shamasynda oıanyp, telefonǵa qaradym. Mádı Súgirbaı da uıqysynan turyp, tamaq surady. Eshkimde bolmady. Ol «bireýiń túsip kelińdershi» dep surady. Eshkim kelispegen soń «sý-lı-fa» oınaýdy buıyrdy. Oǵan da eshkim kelispeı, men ári qaraı uıyqtap qaldym. Sodan tańǵy 4:00 shamasynda meni polıtsııa qyzmetkeri oıatty. Turǵan kezde jerden tósek jamylǵysyn kórdim, — kýáger.
Kámelet jasqa tolmaǵan taǵy bir kýáger sottalýshy Mádı Súgirbaıdan qorqatynyn, buǵan deıin de ol jataqhana ishinde ózderin uryp-soqqanyn aıtty.
— Nurbaqyt Baqyt kıinip, dúkenge barýǵa daıyndalyp jatty. Kim tapsyrma bergenin naqty bilmeımin. Terezeden túsý úshin bárimiz tósek jamylǵysyn bir-birine baılap, daıyndadyq. Jamylǵyny kórshi bólmeden de aldyq. Ol birden túspedi. Terezeniń arǵy jaǵyna shyqqan soń kidirdi. Biz «qorqyp tursyń ba» dep suradyq. Qorqyp turǵynyn aıtqan soń kirgizip aldyq ishke. Taǵy da suraǵanda, Mádı bizge keldi. Ol ózge bólmeden qarap turǵan. Jaryqty óshirip qoıyp, ony tómen túsirdik. Qulaǵanda basymyzdy terezeden shyǵaryp, aıqaıladyq, — dedi kýáger.
Sottalýshynyń anasy taǵylǵan aıyppen kelispedi. Tek balasynyń 2 000 teńge aqsha bergenin, tamaqqa dep qosqanyn aıtty. Sot aldy tergeýi kezinde sottalýshy Mádı Súgirbaıdyń uıaly telefony is materıalyna tirkelmedi. Kelesi sot otyrysynda sottalýshy jaýap berip, óz sońǵy sózine daıyndalady.
Al jábirlenýshi tarap keshirim bermeıtinin, 1 mln teńgeden astam materıaldyq, 500 myń teńge zańdy ókil jáne 20 mln teńge moraldyq shyǵyndy óteýdi surady.
Sot otyrysy jalǵasyp jatyr.
Eske salaıyq, ál-Farabı atyndaǵy Qazaq ulttyq ýnıversıtetiniń geografııa jáne tabıǵatty paıdalaný fakýltetinde oqyǵan birinshi kýrs stýdenti qaza tapty. Jelide taraǵan aqparatqa sáıkes, túnde stýdentter arasynda tóbeles bolǵan.