Aqtóbede stýdent qyz kópqabatty úıden sekirip ketti
AQTÓBE. QazAqparat Aqtóbede túngi saǵat 3-ten 20 mınýt ketkende 17 jastaǵy qyz 8 qabattan sekirip ketti. Ol jaldamaly páterde aǵasymen birge turǵan, dep habarlaıdy QazAqparat tilshisi.
Aqtóbede tótenshe oqıǵa tirkeldi. Túngi saǵat 3-ten 20 mınýt ketkende oblystyq jedel járdem beketine shaqyrtý túsken. Qalalyq jedel járdem qyzmeti bas dárigeriniń orynbasary Dastan Netalıevanyń aıtýynsha, dárigerler oqıǵa ornyna jetkende tek stýdent qyzdyń ólimin tirkegen. Qazir osy jaǵdaıǵa baılanysty Qylmystyq kodekstiń «Ózin-ózi óltirýge deıin jetkizý» baby boıynsha is qozǵaldy. Tergeý amaldary bastaldy.
«Polıtsııaǵa Aqtóbe qalasynyń Á.Moldaǵulova dańǵyly boıynda ornalasqan kópqabatty úılerdiń birinen adamnyń sekirip ketkeni týraly habar tústi. Belgili bolǵany, joǵary qabattan sekirip ketken adam 17 jastaǵy kolledj stýdenti eken. Ol jaldamaly páterde aǵasymen birge turǵan. «Eshkimge kiná artpaımyn» dep hat qaldyrǵan. Polıtsııa oqıǵanyń mán-jaıyn tekserip, tergeý amaldaryn júrgizip jatyr»,- dep habarlady oblystyq ІІD-niń baspasóz qyzmeti.
