Aqtóbede stomatologııa ákimshisin kepilge alǵan Abylaı Tileýovpen aradaǵy kelissóz ǵalamtorǵa jarııalandy
AQTÓBE. QazAqparat - Aqtóbede 24 jastaǵy jigittiń stomatologııa ákimshisin kepilge alǵan sáti ǵalamtorǵa shyǵyp ketti. Beıneaıǵaqta er adam stomatologııa ishindegi qyzdyń tamaǵyna úshkir zat kezenip turǵany kórinedi, dep habarlaıdy QazAqparat tilshisi.
Aqtóbede 14 naýryz kúni 24 jastaǵy Abylaı Tileýov «Jemchýg+» stomatologııalyq klınıkasyna baryp, sol jerde jumys isteıtin áıelin tappaǵan soń, qyzmetkerdi kepilgen alǵan bolatyn. Oblystyq ishki ister departamenti men prokýratýra 5 saǵat boıy kelissóz júrgizdi. Oqıǵa ornyna qylmyskerdiń ata-anasy, týystary shaqyrylyp, tildesý kezinde bir toqtamǵa kelý múmkin bolmaǵan. Eshkim A.Tileýovti raıynan qaıtara almady. Al búgin ǵalamtorǵa sol kúngi oqıǵanyń bir kórinisi shyǵyp ketti. Beıneaıǵaqta er adam stomatologııa kabınetindegi bir bólmeniń buryshynda tur. Ol kepilge alǵan qyzdyń tamaǵyna úshkir, ótkir zat kezenip tur. Qazirgi ýaqytta oblystyq ishki ister departamenti beıneaıǵaqtyń qalaı ǵalamtorǵa shyǵyp ketkenin anyqtap jatyr.
Buǵan deıin Aqtóbede er adam stomatologııa ákimshisin kepilge alyp, áıelin jetkizýdi talap etkeni týraly habarlaǵan bolatynbyz .
Eske salsaq, Abylaı Tileýov áıelin óltirý maqsatynda ony aldymen ata-anasynyń úıinen izdep, sol jerde qaıyn enesin jaralaǵan. Keıin stomatologııalyq klınıkaǵa baryp, sol jerde ákimshini kepilge aldy. Polıtsııa men prokýrorlar kepilge alynǵan adamnyń ómirin qutqarý maqsatynda arnaıy operatsııa júrgizdi. 24 jastaǵy jigitti toqtatý úshin tabeldi qarý qoldanylyp, ol sol jerde qaza boldy.
Vıdeo diapazon.kz saıtynan alyndy:
