Aqtóbede sport mektepterinde 19 myńnan astam bala jattyǵady
Aqtóbe oblysynyń ákimi Ońdasyn Orazalın sportpen jáne dene shynyqtyrýmen shuǵyldanatyn turǵyndardyń sanyn, ásirese óskeleń urpaqty kóbeıtýdi tapsyrdy.
«Qolda bar sporttyq sektsııalardy, klýbtardy barynsha tıimdi paıdalanyp, jańasyn ashý qajet. Buqaralyq jáne balalar sportynyń qoljetimdiligin arttyrýǵa erekshe nazar aýdarý kerek»,- dedi Ońdasyn Orazalın.
№ 4 kúres boıynsha OBJSM-niń materıaldyq-tehnıkalyq bazasyn qarap shyqqan oblys ákimi mektep aýmaǵyna taǵy bir ǵımarat salý týraly ótinishti qoldady. Aıta keteıik, kúres sektsııalary joǵary joǵary suranysqa ıe. Jyl sońyna deıin jobalyq-smetalyq qujattamany bekitý tapsyryldy. Al № 1 BJSM-de qabyrǵalardaǵy jaryqtyń sebebin kidirtpeı anyqtap, eger ǵımarattyń qaýipsizdigine zııan keltirmese, qalpyna keldirýdi tapsyrdy. Nysan 2016 jyly paıdalanýǵa berilgen. Sondaı-aq abattandyrý jumystary aıaqtalyp qalǵan trıatlon parkin de qarap shyqty. Qazirgi tańda mundaǵy júgiretin jáne velosıped júretin joldar 100% daıyn, jaryq ornatyldy, sýarý júıesi jolǵa qoıyldy. Halyqtyń qalaýy boıynsha jaıaýjoldar da jasalady. Oblys ákimi trıatlon parkiniń aqtóbelikter úshin barynsha qolaıly qoǵamdyq keńistik bolýyn atap ótti.
«Munda bárine, ıaǵnı, sportpen kásibı shuǵaldanatyndarǵa da, jaı jaıaý júrip qaıtqysy keletinderge de yńǵaıly bolýy kerek. Barlyq sporttyq nysanda qolaıly jaǵdaı jasap, halyqqa barynsha qoljetimdi etý qajet. Prezıdent tapsyrmasyna sáıkes, buqaralyq sportty damytý - basym mindetterdiń biri»,- dedi Ońdasyn Orazalın.
Aqtóbe oblysynda balalar men jasóspirimderge arnalǵan barlyǵy 32 sport mektebi jumys isteıdi. Onda 19 myńnan asa bala jattyǵady, taǵy 36 myń bala aýla klýbtaryna baryp júr. Bıyl BJSM-niń jattyqtyrýshy-oqytýshylarynyń shtaty kóbeıip, 105 adamǵa artty. Barlyq aýdandyq BJSM-niń fılıaly bar. Búginde 62 aýylda BJSM fılıaly jumys istep tur. Aıta ketý kerek, BJSM-niń materıaldyq-tehnıkalyq bazasyn nyǵaıtý úshin 2019 jyly 40 mln teńge, al byltyr 115 mln teńge bólingen. Sportpen shuǵyldanýǵa nıetti aqtóbelikter úshin barlyǵy 1800-den asa sport nysany qoljetimdi. Sonymen birge, jańa sport nysandarynyń, dene shynyqtyrý-saýyqtyrý keshenderiniń qurylysy jalǵasyp jatyr. Máselen, jyl basynan beri Aqtóbe qalasynda shańǵy rolleri trassasy men Oıyl aýylynda dene shynyqtyrý-saýyqtyrý kesheni paıdalanýǵa berildi. Qarǵaly, Temir, Muǵaljar, Hromtaý aýdandarynyń ortalyǵynda, sonymen qatar, Hromtaý aýdanynyń Kóktaý aýylynda bes dene shynyqtyrý-saýyqtyrý kesheniniń qurylysy júrip jatyr. «Samruq – Qazyna - Trasttiń» qoldaýymen Muǵaljar aýdanynyń Embi qalasynda BJSM janynan dene shynyqtyrý-saýyqtyrý keshenin turǵyzý bastaldy. Sondaı-aq, bıznestiń áleýmettik jaýapkershiligi aıasynda Aqtóbede trıatlon parkiniń qurylysy aıaqtalyp, «Jumyspen qamtýdyń jol kartasy» aıasynda bıyl fızıkalyq múmkindigi shekteýli jandarǵa arnalǵan sport keshenin jáne Jarqamys, Jarly, Jaǵabulak pen Qurylys aýyldarynda tórt sport keshenin salý úshin qarjy bólý josparlanyp otyr. Qazirgi tańda Aqtóbe oblysy halqynyń 32% astamy dene shynyqtyrýmen jáne sportpen shuǵyldanady.
