Aqtóbede sport mektebiniń tárbıelenýshisi belgisiz jaǵdaıda kóz jumdy

AQTÓBE. KAZINFORM – Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledjiniń 8 synyp oqýshysy kóz jumdy. Polıtsııa densaýlyqqa qasaqana aýyr zııan keltirý deregi boıynsha is qozǵady.

Oqıǵa 11 sáýir kúni saǵat 21:30-da tirkelgen. Oqıǵanyń mán-jaıyn Aqtóbe oblystyq Dene shynyqtyrý jáne sport basqarmasynyń basshysy habarlady.

- Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledjiniń 8 synyp oqýshysy byltyr erkin kúres tobyna qabyldandy. 11 sáýir kúni jataqhanada talyp qalǵan. Jedel járdem shaqyryldy. Ol aýrýhanaǵa jetpeı, jedel járdem kóliginde qaıtys boldy. Qazirgi ýaqytta balanyń qandaı sebepten qaıtys bolǵany anyqtalyp jatyr, - dedi Aqtóbe oblystyq Dene shynyqtyrý jáne sport basqarmasynyń basshysy Evgenıı Goncharov.

Aqtóbe oblystyq Polıtsııa departamenti tergeýdi bastap, qylmystyq is qozǵady.

- Densaýlyqqa qasaqana aýyr zııan keltirý faktisi boıynsha sotqa deıingi tergeý bastaldy. Sondaı-aq, sport mektebiniń qyzmetkerlerine qatysty mindetterine adal qaramaý faktisi boıynsha sotqa deıingi tergeý júrgizilýde. Barlyq qajetti saraptamalar taǵaıyndaldy, - dep habarlady Aqtóbe oblystyq Polıtsııa departamenti baspasóz qyzmetiniń jetekshisi Erbolat Sarqulov.