Aqtóbede sport mektebiniń oqýshysyn óltirgender sottaldy
AQTÓBE. KAZINFORM — Aqtóbe qalasynda sport mektebiniń 8-synyp oqýshysyn uryp, óltirip alǵan eki tárbıelenýshige úkim shyqty. Onyń biri 9 jylǵa, ekinshisi 6 jyl 8 aıǵa bas bostandyǵynan aıyryldy.
Aqtóbe oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynda oqýshy ólimine qatysty is jabyq qaraldy. Іs materıalyna súıensek, bıyl 11 sáýir kúni Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledjiniń 2-kýrs stýdenti erkin kúrespen aınalysatyn 8-synyp oqýshylarynyń tártibi men sporttaǵy nátıjeleriniń nasharlaýyna baılanysty jınalys uıymdastyrǵan. Jınalys keshki jattyǵýdan keıin josparlanǵan. Oqýshylardy jınaýdy kolledjdiń 2-kýrs stýdenti tapsyryp, onymen birge isti bolǵan oqýshy jáne 9-10 synyp balalary buıryqty buljytpaı oryndaıdy. Jınalǵan soń sottalýshy 8-synyp oqýshylaryn bir sapqa turǵyzyp, olarǵa moraldyq pen fızıkalyq qysym kórsetip, ózgelerdiń birtindep urýyna tapsyrma beredi. Tipti jáı urǵandaryn aıtyp, qattyraq qaıta urýdy talap etedi. Keıin sottalýshynyń biri qaza tapqan oqýshynyń eki betinen urady. Eki ıyǵynan ustap, tezesimen onyń keýde tusynan tebedi. Saldarynan jábirlenýshi esinen tanyp, shalqasynan qulap, kóz jumǵan.
— Sot úkimimen sottalýshy Q kináli dep tanylyp, oǵan 9 jyl merzimge bas bostandyǵynan aıyrý jazasy, al sottalýshy J kináli dep tanylyp, oǵan 6 jyl 8 aı merzimge bas bostandyǵynan aıyrý jazasy taǵaıyndalsyn. Q jazasyn Qylmystyq atqarý júıesiniń qaýipsizdigi ortasha mekemesinde, J jazasyn kámeletke tolmaǵandardy ustaýǵa arnalǵan qylmystyq atqarý júıesi mekemesiniń qaýipsizdigi ortasha mekemesinde óteý belgilensin. Azamattyq talap aryz ishinara qanattandyrylsyn. Jábirlenýshine 20 mln teńge moraldyq zııan, 2 158 915 teńge materıaldyq shyǵyn ótelsin, — dedi sýdıa Erjan Qurmanov.
Eske salsaq, oqıǵa 11 sáýir kúni saǵat 21:30–da tirkelgen. Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledjindegi oqýshy qazasynan soń eki tárbıelenýshi kúdikke iligip, qamaýǵa alyndy. Úsh qylmystyq is qozǵaldy. Al oblystyq dene shynyqtyrý jáne sport basqarmasynyń basshysyna, mektep dırektoryna, tárbıe isi jónindegi orynbasaryna qatań sógis berildi.