Aqtóbede sport mektebindegi tárbıelenýshi óliminen soń birneshe basshyǵa qatań sógis berildi

AQTÓBE. KAZINFORM – Eset batyr atyndaǵy olımpıada rezervi oblystyq mamandandyrylǵan mektep-ınternat-kolledjiniń 8 synyp oqýshysynyń óliminen soń birneshe basshy qatań sógis alyp, jattyqtyrýshylar jumystan ketti.

Aqtóbe qalasynda ornalasqan Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledjindegi qaıǵyly oqıǵadan soń oblystyq Dene shynyqtyrý jáne sport basqarmasynyń basshysyna, mektep dırektoryna, tárbıe isi jónindegi orynbasaryna qatań sógis berildi. 

— Dırektordyń tárbıe isi jónindegi orynbasary óz erkimen jumystan ketti. Sonymen birge erkin kúrestiń 4 jattyqtyrýshysy 1 maýsymnan bastap óz erkimen jumystan shyǵyp jatyr, - dedi Aqtóbe oblystyq Dene shynyqtyrý jáne sport basqarmasynyń basshysy Evgenıı Goncharov. 

Eske salsaq, bıyl 11 sáýir kúni saǵat 21:30–da mektep-ınternat-kolledjiniń 8 synyp oqýshysy kóz jumdy. Polıtsııa Qylmystyq kodekstiń densaýlyqqa qasaqana aýyr zııan keltirý faktisi boıynsha is qozǵady. Keıin osy oqý ornynyń 2 tárbıelenýshnisi qamaýǵa alynyp, Qylmystyq kodekstiń «Buzaqylyq», «Densaýlyqqa qasaqana aýyr zııan keltirý» baptary boıynsha tergeý bastaldy.

Qazirgi kezde tergeý júrip jatyr.