Aqtóbede sport mektebi tárbıelenýshisiniń ólimine qatysty is jabyq ótedi
AQTÓBE. KAZINFORM – Aqtóbe oblystyq kámeletke tolmaǵandardyń isteri jónindegi mamandandyrylǵan sotta Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledji tárbıelenýshisiniń ólimine qatysty is qarala bastady. Jábirlenýshi pen prokýror sottyń ashyq ótkenin suraǵanymen, aıyptalýshylar qarsy bolyp, sot protsesti jabyq ótkizýge qaýly shyǵardy.
Aqtóbe oblystyq kámeletke tolmaǵandardyń isteri jónindegi mamandandyrylǵan sotta QR Qylmystyq kodekstiń 106-babynyń 3-bóligi, ıaǵnı, «Densaýlyqqa qasaqana aýyr zııan keltirý» babymen is qaralyp jatyr. Aıyptalýshylar Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledjiniń 10 synyp oqýshysy jáne kolledj stýdenti.
Sot otyrysy bastalmas buryn sýdıa Erjan Qurmanov aıyptalýshylardyń qorǵaýshylarynan sottyń ashyq ne jabyq ótýi jaıly pikirin surady. Qos aıyptalýshynyń qorǵaýshysy Qylmystyq protsestik kodekstiń 542-babyna súıenip, sottyń jabyq ótýin surady. Al, jábirlenýshi tarap pen prokýror rezonans týdyrǵan istiń ashyq ótkenin qalady.
– Qylmystyq protsestik kodekstiń 29-babyna sáıkes qylmystyq is ashyq túrde júrgiziledi. Kámeletke tolmaǵan sottalýshy bolsa oǵan shekteý bolýy múmkin. Sot sotty jabyq ótkizý týraly qaýly etti, - dedi sýdıa Erjan Qurmanov.
Sot zalynan shyǵarylǵan marqum Áýbákir Beksultannyń anasy Zoıa Bazarbaeva buǵan qarsy bolyp, protsestiń ashyq ótýin surady.
– Kámeletke tolmaǵandardyń isteri jónindegi sot dep protsesti jabyq ótkizedi. Ákesi ǵana ishte qalyp, meni shyǵaryp jiberdi. Men buǵan qarsymyn. Óıtkeni rezonans boldy. Búkil el biledi. Onyń nesin jasyryp otyr? Men soǵan qarsymyn. Muǵalim, dırektordy jazalaǵan joq. Tek eki balany sotqa ákeldi. Qalǵan 5 bala qaıda? Mektep, basqarma qaıda qarap otyr? Sonda mektepke sap-saý balany jiberip, denesin alamyz ba? Eset batyr mektebi meniń ómirime, balamnyń taǵdyryna qasiret ákelip tur. Balamnyń janynda bolǵan syńary ózimen ózi oqshaýlanyp qaldy. Arada 132 kún ótti. Ol kúnde syńaryn túsinde kóredi. Ómirlik stress aldy, - dedi jábirlenýshi Zoıa Bazarbaeva.
Ol qaıǵyly oqıǵa bolǵan kúni jalǵan aqparat taratqan mektep dırektorynyń, jattyqtyrýshylary men bapkerleriniń, basqarma basshylarynyń jaýapqa tartylyp, jazalanǵanyn surady.
Eske salsaq, bıyl 11 sáýir kúni Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledjinde 8 synyp oqýshysy kóz jumdy.
Tergeý kezinde eki tárbıelenýshi qamaýǵa alyndy.
Oblystyq Dene shynyqtyrý jáne sport basqarmasynyń basshysyna, mektep dırektoryna, tárbıe isi jónindegi orynbasaryna qatań sógis berildi. 4 jattyqtyrýshy óz erkimen jumystan ketti.
