Aqtóbede sport keshenin jalǵa berip, aqshany qumar oıynǵa salǵan burynǵy dırektor sottaldy
AQTÓBE. KAZINFORM — Aqtóbede sport mektepteriniń dırektory qyzmetin atqarǵan M.Áýelbaev pen Q.Dılmanov sottaldy. Olar sport mektebiniń zalyn jalǵa berip, aqshany óz qaltasyna basyp otyrǵan.
№ 2 Aqtóbe qalalyq sotynda sport mektebiniń dırektory qyzmetin atqarǵan Maqsat Áýelbaev pen Qaırat Dılmanovqa qatysty qylmystyq is qaraldy.
Alǵashynda is Qylmystyq kodekstiń «Alaıaqtyq» baby boıynsha sotqa túskenimen, keıin «Aldaý nemese senimdi teris paıdalaný jolymen múliktik zalal keltirý» babyna ózgertildi. Іs materıalyna súıensek, 2022 jyldyń qańtar aıynan bastap Áýelbaev áriptesi Dılmanovpen birge aqsha tabýdy oılaıdy. Olar fýtbol alańyn jalǵa berý aqyly ekenin, kelisimshart aıasynda ony arnaıy esepshotqa aýdarý kerek ekenin biledi. Biraq bul joldy tańdamaı, ózge baǵytta ketedi.
2022 jyldyń shilde aıy men 2024 jyl aralyǵynda Dılmanov mektep basshysy Áýelbaevpen kelisip, fýtbol alańyn bir ret jalǵa alýshylarmen aýyzsha, WhatsApp messendjeri arqyly kelisedi. Dılmanov aqshany qolma-qol, keıde qyzynyń esepshotyna aýdarýǵa ýaǵdalasady. Sóıtip jalǵa alýshylardan jalpy somasy 11 579 565 teńge túsken. Sonymen birge qyzynyń esepshotyna túsken 650 720 teńgeni ózine aýdaryp, keıin Áýelbaevpen bólisedi. Áýelbaev aqshany óz qajetine jumsaǵan, tipti qumar oıynǵa salǵan.
Sot úkimimen Maqsat Áýelbaev, Qaırat Dılmanov Qylmystyq kodekstiń «Aldaý nemese senimdi teris paıdalaný jolymen múliktik zalal keltirý» baby boıynsha aıypty dep tanyldy. Maqsat Áýelbaevqa 2 jylǵa bas bostandyǵynan shekteý, Qaırat Dılmanovqa 2 jyl 6 aıǵa bas bostandyǵynan shekteý jazasy taǵaıyndaldy. Sonymen birge memlekettik qyzmette 3 jyl boıy jumys isteı almaıdy. Sot úkim shyǵarar kezde shyǵynnyń tolyq ótelgenin, sottalýshylardyń balalary bar ekenin, buryn isti bolmaǵanyn eskerdi.
Eske salsaq, byltyr Aqtóbede lýdoman esepshige erik berip qoıǵan mektep dırektory sottaldy. Sot dırektordy 3 jylǵa bas bostandyǵynan aıyrdy.