Aqtóbede sottalýshylarǵa bıznes negizderi úıretilýde
AQTÓBE. QazAqparat - Aqtóbede jazasyn óteýshilerge memlekettik baǵdarlamalardyń maqsaty men mazmuny túsindirildi.
«Atameken» kásipkerler palatasy bıznespen aınalysýdyń joldaryn úıretse, jumyspen qamtý ortalyǵy bos jumys oryndary týraly aıtyp berdi, dep habarlaıdy QazAqparat tilshisi.
Aqtóbedegi KA 168/3 túzetý mekemesinde 160-tan astam adam jazasyn ótep otyr. Olardyń 30-dan astamy názik jandy. Ashanada 10 adam tamaq pisirse, er azamattar óndiris oryndarynda eńbek etedi.
«Mekeme janynda 4 óndiris orny jumys istep tur. Qazirgi kúni 90 sottalýshy sol jerde eńbek etedi. Balabaqshalardaǵy oıyn alańdary men monsha, saýnaǵa arnalǵan aǵash buıymdardy daıyndaıtyn jazasyn óteýshiler aıyna 30-40 myń teńge jalaqy alyp, otbasyna kómektesip turady»,- deıdi 168/3 túzetý mekemesiniń bastyǵy Álibek Mıtanov.
Qonys kolonııasynda jumys isteıtin Gúlmıra Ýálisheva adamdardy aldap, 5 jábirlenýshini shyǵynǵa batyrǵany úshin Qylmystyq kodekstiń «Alaıaqtyq» baby boıynsha 5 jylǵa sottalǵan. Qazir KA 1986/3 túzetý mekemesinde aspaz bolyp jumys isteıdi. Buǵan deıin Atyraýdaǵy túrmede 2 jyl 8 aıyn ótep, sol jerde mamandyq alǵan. Jumys isteý arqyly ol jábirlenýshilerge berejaq 1 mıllıon 200 myń teńge aqshany óteýi tıis. Sondyqtan jumysty talǵamaıdy, qaryzyn óteýge tyrysady.
«Bizge «Jumyspen qamtýdyń 2020 jol kartasy», «Bıznestiń jol kartasy-2020» memlekettik baǵdarlamalary túsindirildi. Qazir jumys óte mańyzdy. Túzetý mekemesinen shyqqan soń turaqty jumysqa ornalasqym keledi. Sóıtip, úsh jábirlenýshige qaryzymdy óteı alamyn»,- deıdi jazasyn óteýshi Gúlmıra Ýálishova. Ol 11 aıdan soń abaqtydan shyǵady. Sol kezde ol birden qalalyq jumyspen qamtý ortalyǵyna bara alady. Al «Atameken» kásipkerler palatasynyń sarapshysy jazasyn óteýshilerge nesıe alyp, kásip ashýdyń tetikterin túsindirdi. Sonymen qatar, tegin kásiptik bilim alý joldary aıtyldy.
Aıta keteıik, oblystyq jastar saıasaty máseleleri basqarmasy men oblystyq jastarmen jumys jónindegi resýrstyq ortalyq túzetý mekemesindegi jastarmen kezdesýdi ári qaraı jalǵastyrady. Aldaǵy kúnderi quqyqtyq, kásiptik saýattylyqty arttyrý jumystary KA 168/1 jáne KA 168/2 túzetý mekemesinde ótedi.
