Aqtóbede sot sheshiminen soń seriktestiktiń shoshqalary satylymǵa shyǵaryldy
AQTÓBE. QazAqparat - Aqtóbede aýdanaralyq ekonomıkalyq sottyń sheshiminen soń «Parıjskaıa kommýna HHІ» JShS-niń múlki satylymǵa shyǵaryldy. Qazirgi kezde 800-ge jýyq shoshqa satyldy, dep habarlaıdy QazAqparat tilshisi.
Bıyl 22 qarasha kúni memlekettik sot oryndaýshysy A.K.Erekenov buǵan deıingi sot sheshimin oryndaý, sóıtip «Parıjskaıa kommýna HHІ» JShS-nan memleket kirisine 7 mlrd teńgeden astam qarjy, jergilikti bıýdjet kirisine 210 mln teńgeden astam memlekettik bajdy óndirip alý úshin aýdanaralyq ekonomıkalyq sotqa ótinish berdi. Alǵa aýdandyq ákimdiginiń habarlaýynsha, seriktestik jumysyn toqtatsa janýarlardyń jappaı qyrylýy, Bestamaq aýyldyq okrýgi turǵyndarynyń narazylyq tanytýy múmkin ekeni eskerildi. QR «Atqarýshylyq is júrgizý jáne sot oryndaýshylarynyń mártebesi týraly» Zańynyń 77-babyna sáıkes, janýarlar tez buzylatyn múlik retinde tanylyp, komıssııa sharty boıynsha satýǵa ruqsat berildi.
«22 jeltoqsan kúni Aqtóbe oblystyq sotynyń azamattyq ister jónindegi sot alqasy otyrysynda boryshkerdiń jeke shaǵymy qaraldy. Ol sot oryndaýshy A.K.Erekenovtyń sot sheshiminiń oryndaý tásili men tártibin ózgertýge ótinish bergen. Aqtóbe oblystyq sotynyń azamattyq ister jónindegi sot alqasy sheshimi boıynsha aýdanaralyq ekonomıkalyq sottynyń sheshimi ózgerissiz jáne boryshkerdiń jeke shaǵymy qanaǵattanarlyqsyz qaldyryldy. Sóıtip 24 jeltoqsannan bastap sot oryndaýshylary sot sheshimderin oryndaýǵa kiristi. 27 jeltoqsanǵa deıin 792 bas shoshqa satyldy. Bul jumystar jalǵasady», - dep habarlady Alǵa aýdandyq ákimdigi.
Buǵan deıin habarlaǵanymyzdaı, osydan bir jyl buryn bir top adam shoshqa fermasynyń jumysyna qarsy shyqty. Aqtóbe oblysy Alǵa aýdany Bestamaq aýylyndaǵy shoshqa fermasyna qatysty tekserý jumysynyń qorytyndysy shyǵaryldy.
