Aqtóbede sońǵy qońyraý men mektep bitirý keshinde reıd júredi
AQTÓBE. KAZINFORM — Aqtóbe oblysynda polıtsııa qaýipsizdikti qamtamasyz etý úshin reıdke shyǵady. Olar demalys oryndary men meıramhanalardy baqylaýǵa alady.
Aqtóbe oblysynda bıyl 10 myńnan astam oqýshy mektep bitiredi. 23 mamyr kúni 9 jáne 11-synyp oqýshylary sońǵy qońyraý sharasyna qatysady.
— Pedagogıkalyq ádepti saqtaý jáne sybaılas jemqorlyq quqyqbuzýdyń aldyn alý maqsatynda bilim berý uıymdarynda qarjy jınaýǵa, anımatorlar men jeke stýdııalardy jaldaýǵa, kólik jaldap, sherý uıymdastyrýǵa, mektepke deıingi uıymdar men 4-synyp oqýshylary úshin saltanatty shara ótkizýge tyıym salynady. Balalardyń qaýipsizdigi basty nazarda bolady. Eger zań buzý bolǵan jaǵdaıda bilim berý uıymynyń basshylaryna qatań shara qoldanylady, — dedi oblystyq bilim basqarmasynyń basshysy Bulbul Kúzembaeva.
Aqtóbe oblystyq polıtsııa departamenti mamyr aıynyń sońyna deıin kúsheıtilgen tártipte jumys isteıdi. Elimizdi «Jasóspirim» jedel aldyn alý sharasy ótip jatyr.
— 23-24 mamyr kúnderi bilim berý uıymdarynda polıtsııa qyzmetkerleri kezekshilik etedi. Bul qoǵamdyq qaýipsizdikti qamtamasyz etý sharasy. Sonymen birge mektep bitirýshi túlekteriniń qaı demalys oryndaryna baratyny týraly anyqtalyp, tizim jasalady. Ol jerlerde de polıtsııa qyzmetkerleri, erikti toptar bolady. Talap boıynsha bala ata-anasymen birge barýy tıis. Eger ózi barsa ata-anasyna Ákimshilik quqyqbuzýshylyq kodekstiń 442-baptyń 1-bóligi «Kámeletke tolmaǵandardyń zańdy ókilderiniń erip júrýinsiz túngi ýaqytta oıyn-saýyq mekemelerinde nemese turǵynjaıdan tys jerde bolýy» boıynsha jaýapqa tartylady. Ata-anaǵa 3 AEK kóleminde aıyppul salynady. Sonymen birge demalys ornynyń ákimshisi kodekstiń 132-baby «Kámeletke tolmaǵandardyń túngi ýaqytta oıyn-saýyq mekemelerinde bolýyna jol berý» boıynsha jaýapqa tartylady, 15-30 AEK kóleminde aıyppul salynady, — dedi oblystyq PD ıývenaldyq polıtsııa tobynyń erekshe tapsyrmalar jónindegi aǵa ınspektory Botakóz Jalekeshova.
Búgin Úkimet basshysy Oljas Bektenov balalardyń qaýipsizdigi men jazǵy demalysty uıymdastyrý máselesin kóterdi.