Aqtóbede sońǵy qońyraý men attestat tapsyratyn kúni túnde reıd júrgiziledi
AQTÓBE. KAZINFORM – Reıdti bilim salasy qyzmetkerleri men quqyq qorǵaý organdary júrgizedi. Ásirese meıramhanalar men demalys bazalaryna basymdyq beriledi. Aqtóbe oblysynda bıyl 11 myńnan astam oqýshy mektep bitiredi. Sońǵy qońyraýdy mektep basshylyǵy men ata-analar komıteti aqyldasa otyryp uıymdastyrýy tıis.
- Mektep basshylary sanıtarlyq talaptardyń saqtalýyn, kezekshiliktiń uıymdastyrylýyn jáne tótenshe jaǵdaılarda evakýatsııa jumystaryn júrgizýdi qamtamasyz etýge mindetti. Saltanatty is-sharalardy uıymdastyrý men ótkizý kezinde bar jaýapkershilik bilim berý uıymdarynyń basshylaryna júkteledi. Sonymen birge saltanatty is-sharada mektepter sheshimdi derbes te qabyldaı alady. Atap aıtqanda mektepke jáne ustazdarǵa alǵys bildirý, án aıtý, óleń oqý, túlekter valsi sııaqty tárbıelik máni bar is-sharalarǵa ruqsat etiledi,- dedi Aqtóbe oblystyq bilim basqarmasynyń basshysy Bulbul Kúzembaeva.
Attestat tabystaý is-sharasy da tek mektep ǵımaratynda nemese mektep aýmaǵynda ótýi tıis. Ol kúni túlekter mektep formasyn kııýge mindetti. Merekelik keshterge arnalǵan erekshe sándi kıim kııýge tyıym salynǵan.
- Muǵalimder men mektep ákimshiligine syılyq berýge, meıramhana, dámhana, banket zaldarynda kesh ótkizýge, avtokólik sherýlerin uıymdastyrýǵa, anımatorlar men merekelik agenttikterdi tartýǵa, tańdy qarsy alý, tabıǵat aıasynda merekelik jıyndar ótkizýge, ata-analardan aqsha jınaýǵa jol berilmeıdi. Basty maqsat - balalardyń qaýipsizdigin qamtamasyz etý jáne bitirý is-sharalaryn qarapaıym, tárbıelik máni bar formatta ótkizý. Saltanatty is-sharalardan keıin túlekterdiń túngi ýaqytta sebepsiz júrýine, qoǵamdyq oryndarda toptasyp merekeleýine jol berilmeýi tıis. Qaýipsizdikti qamtamasyz etý maqsatynda quqyq qorǵaý organdarymen birlesip, adamdar kóp jınalatyn oryndarda reıdtik is-sharalar uıymdastyrylady,- dedi Bulbul Kúzembaeva.
Buǵan deıin Kazinform mektep túlekteri sońǵy qońyraýǵa qansha teńge jumsaıtyny týraly jazdy. Bıyl elimizdegi óńirlerde túlekter albomy, lenta jáne fartýk baǵasy ózgerdi.
