Aqtóbede soqyrishekke jasalǵan otadan oqýshy kóz jumdy
AQTÓBE. QazAqparat - Aqtóbe soqyrishekke ota jasalyp, mektep oqýshysy kóz jumdy. Qazir osy oqıǵa boıynsha arnaıy komıssııa qurylyp, saraptama jasalyp jatyr, dep habarlaıdy QazAqparat tilshisi.
Oqıǵa Hromtaý qalasynda bolyp, ota Aqtóbe oblystyq aýrýhanasynda jasalǵan edi. Otadan soń oqýshynyń qaıtys bolýyna baılanysty arnaıy komıssııa ólimniń sebebin anyqtaıdy.
«Ata-anasy balany Aqtóbe qalasyna ózderi ákeldi. Hromtaý aýdandyq dárigeri jazbasha túrde kelisim almaǵan soń olar da jaýapkershilikke tartylady. Medıtsınalyq jedel járdem kóligi bar, biraq ata-ana ózi sheshim qabyldaǵan. Osy kezde dárigerler jazbasha túsinikteme alýy tıis bolatyn. Aqtóbe balalar aýrýhanasyna túsken soń ota jasaldy. Otadan keıin palataǵa aýystyrdy. 5 mınýttan keıin naýqastyń tynys alýy nasharlap, renımatsııalyq qutqarý júrgizildi. Biraq nátıje bolmaǵan. Qazir komıssııa qurylyp, tekserý júrip jatyr. Aldyn ala anafılaktıkalyq shok dep dıagnoz qoıyldy. Gıstologııalyq zertteý kezinde bári anyqtalady», - dedi Aqtóbe oblystyq densaýlyq saqtaý basqarmasy basshysynyń orynbasary Svetlana Esenamanova.
Aıta keteıik, qazirgi kezde balaǵa ota kezinde uıyqtatatyn dári bergen dáriger jumysynan shettetilip, jansaqtaý bóliminiń meńgerýshisi óz erkimen jumystan shyqty.
«Jumystan shyqqan dáriger iske qatysty jaýap berýi tıis bolsa shaqyrylady. Biraq ol narkoz bergen joq», - dedi S.Esenamanova.
