Aqtóbede soǵys ardagerleri 2,1 mln teńgeden materıaldyq kómek alady
AQTÓBE. QazAqparat – Aqtóbe oblysynda úsh maıdanger turady. Bıyl Jeńis kúninde olarǵa 2,1 mln teńgeden materıaldyq kómek beriledi, dep habarlaıdy QazAqparat tilshisi.
Soǵys ardagerleri Aqtóbe qalasy men Muǵaljar, Hromtaý aýdandarynda turady.
«Óńirdegi 3 soǵys ardagerine 2 140 000 teńgeden materıaldyq kómek kórsetiledi.
Soǵys qatysýshylaryna teńestirilgen 415 adamǵa 100 myń teńgeden qarastyrylǵan.
Al Ekinshi dúnıejúzilik soǵysta qaza tapqan, habar-osharsyz ketken jaýyngerlerdiń 149 jesirine 50 000-100 000 teńgeden beriledi.
Soǵys ardagerlerin jáne ardagerlerge teńestirilgen azamattarǵa oblys jáne aýdan basshylarynyń quttyqtaýy uıymdastyrylady. Onlaın formatta «Er esimi – el esinde» patrıottyq sharasy ótedi», - dedi oblystyq ishki saıasat basqarmasy basshysynyń orynbasary Serik Qonaqbaev.
Aıta keteıik, 9 mamyr kúni Aqtóbe qalasyndaǵy «Máńgilik alaý alańynda», «Á.Moldaǵulova eskertkishi alańynda», «Danq alleıasynda» qurmetti qaraýyl qyzmeti uıymdastyrylyp, gúl shoqtaryn qoıý rásimi ótedi. Sondaı-aq qalanyń 11 alańynda kontserttik sharalar uıymdastyrylady. Onda qazaqstandyq «Jeńis lentasyn» jappaı taratý josparlanyp otyr.
