Aqtóbede «SMART sot» pen «Túngi sot» pılottyq jobasy nátıjeli iske asty
AQTÓBE. QazAqparat - Aqtóbe oblystyq sotynyń tóraǵasy Sáken Abdolla jartyjyldyqty qorytyndylap, pılottyq jobalardyń tıimdiligi týraly aıtty, dep habarlaıdy QazAqparat tilshisi.
Jyl basynan beri Aqtóbe oblysynyń sottary 1048 adamǵa qatysty 949 qylmystyq isti qarady. Onyń ishinde 653 adamǵa qatysty 592 úkim shyǵaryldy. Bıyl 17 adam aqtalyp shyqty. Al sottalǵandardyń 24,6% bas bostandyǵynan aıyryldy.
«Ótken jyldyń 6 aıynda oblys sottary elektrondy túrde 3, bıyl 126 qylmystyq isti qarady. Statıstıkalyq málimetterge sáıkes, oblystyń sýdıalary 1112 ótinishti qaraǵan. 2019 jyldyń 6 aıynda apellıatsııalyq tártippen 177 is kelip tústi, bul 2018 jyldyń sáıkes kezeńine qaraǵanda 40 iske az. Barlyǵy eseptik kezeńde oblys sottary azamattyq sot isin júrgizý tártibinde 13 532 isti aıaqtady, 2018 jyldyń sáıkes kezeńinde 20 461 is qaralǵan bolatyn. Іster sanynyń azaıýy «Qazaqstan Respýblıkasynyń keıbir zańnamalyq aktilerine menshik quqyǵyn qorǵaýdy kúsheıtý, tórelik, sot júktemesin ońtaılandyrý jáne qylmystyq zańnamany odan ári izgilendirý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń 2019 jylǵy 21 qańtardaǵy Zańynyń qabyldanýyna baılanysty tirkelip otyr», - dedi Aqtóbe oblystyq sotynyń tóraǵasy Sáken Abdolla.
Aıta keteıik, 2019 jyldyń 6 aıynda oblys sottary 12 233 ákimshilik isti qarap, 205 is tatýlasýmen aıaqtaldy. Oblys sottarynda birqatar pılottyq jobalar da iske asty. Máselen, «SMART sot» jobasy aıasynda 543 is, «Túngi sottar» 916 ákimshilik isti qarady. «Otbasylyq sottar» bitimgershilik arqyly 567 isti aıaqtasa, «Sottaǵy tatýlasý rásimderi» jobasynyń sheńberinde oblys sottary 1895 istiń nátıjesin shyǵardy. Sonymen qatar, óńirdiń aýdandyq sottarynda «Sottan tys tatýlastyrý rásimderi» jobasy tabysty júzege asyrylyp keledi. Onyń kómegimen daýdy sotqa deıin retteý týraly 149 kelisim jasaldy.
