Aqtóbede sıntetıkalyq esirtki taratatyn iri arnanyń joly kesildi
ASTANA. KAZINFORM – Aqtóbede kólik polıtseıleri sıntetıkalyq esirtki taratatyn iri arnanyń jolyn kesti.
Arnaıy operatsııa barysynda jedel ýákilder 10 keli Alfa-PVP psıhotroptyq zatyn tárkilep, iri esirtki dúkenin jabdyqtaý arnasyn buǵattady jáne tutynýshylarǵa myńdaǵan birjolǵy dozanyń jetýine jol bermedi.
Qylmystyq top ıerarhııa boıynsha kóleńkeli segmenttiń jolǵa qoıylǵan shemasymen áreket etip, anonımdi operatordyń nusqaýlaryn oryndaı otyryp, esirtki dúkeniniń «qoımashylary» retinde jumys istegen.
Qylmystyq nıetti júzege asyrý úshin qaskúnemder jeke úıdi jalǵa alyp, keıinnen ony ólshep-oraý tsehy retinde paıdalanǵan. Úı-jaıdy tintý barysynda psıhotroptyq zattar salynǵan 5 paket tabyldy. Tergeý barysynda ustalǵandar kinálaryn moıyndap, esirtki jasyrylǵan orynnyń qaıda ornalasqanyn aıtty. Nátıjesinde orman alqabyndaǵy atalǵan jerden esirtki salynǵan taǵy 10 paket tárkilendi.
Psıhotroptyq zattardy asa iri mólsherde ótkizý faktisi boıynsha Qylmystyq kodeksiniń 297-baby 3-bóligine sáıkes sotqa deıingi tergep-tekserý amaldary bastaldy. Endi fıgýranttarǵa múlki tárkilenip, 15 jylǵa deıin bas bostandyǵynan aıyrý jazasy qaýpi tónip tur. Ustalǵandar qamaýǵa alyndy.
Aıta ketelik Kaspıı teńizinde halyqaralyq esirtki arnasynyń joly kesilgeni týraly jazǵan edik.
