Aqtóbede shoshqa fermasynyń ıesi úıqamaqqa alyndy
AQTÓBE. QazAqparat – Aqtóbede shoshqa fermasynyń ıesine qatysty qylmystyq is qozǵaldy, kásipker úıqamaqta otyr, dep habarlaıdy QazAqparat tilshisi.
Aqtóbedegi shoshqa fermasyna qatysty aldymen ákimshilik is qozǵalyp, barlyǵy 7 mıllıard teńgeden astam aıyppul salyndy. Keıin seriktestik qaıta appelıatsııalyq shaǵym túsirdi. Al sol appelıatsııalyq sotta eki aryz sheshimi ózgerissiz qaldyrylyp, sot oryndaýshylary zań aıasynda jumysqa kiristi.
«Qazirgi ýaqytta Aqtóbe oblysy boıynsha jeke sot oryndaýshylary óńirlik palatasyna eki atqarý paraǵy tústi. Birinshisi kóń qoımasyn paıdalaný, ekinshisi aǵyndy sýlardyń qorshaǵan ortany lastaýy. Sot oryndaýshylary boryshkerge sot sheshimderin oryndaý týraly habarlama berdi. Merzimi bir apta. Biraq atqarylýy tıis is aýqymy kóp. Bir aptada úlgerýi neǵaıbil», - dedi Aqtóbe oblysy boıynsha jeke sot oryndaýshylary óńirlik palatasy basshysynyń orynbasary Qaırat Tańqaev.
Sonymen birge shoshqa fermasynyń ıesine qatysty qylmystyq is qozǵaldy.
«Ekologııa departamentiniń tekserýinen soń qylmystyq is qozǵaldy. Qylmystyq kodekstiń «Jerdi búldirý» baby boıynsha tergeý júrip jatyr. Seriktestik basshysy Gaık Terterıan úıqamaqta otyr. Kúdiktiniń kinási dáleldense, 5 jylǵa deıin bas bostandyǵynan aıyrylýy múmkin», - dedi oblystyq PD tergeý basqarmasynyń aǵa tergeýshisi Aıgúl Imanǵazına.
