Aqtóbede shomylý maýsymy kezinde 7 ákim ákimshilik jaýapqa tartyldy
AQTÓBE. KAZINFORM - Aýyldyq okrýg ákimderi sý aıdyndary men ózenderge tyıym salý belgisin ornatpaǵan. Sonymen birge ruqsatsyz jumys istegen jaǵajaı basshylary da aıyppul tóledi.
Aqtóbe oblysynda shomylý maýsymy aıaqtaldy. Bıyl jaǵajaı ıelerinen barlyǵy 67 ótinish túsip, tekserýden soń onyń 33-i paıdalanýǵa berildi. Kommýnaldyq jáne jekemenshik jaǵajaılardaǵy qutqarý beketterin jasaqtaý úshin 85 jasaqshy-qutqarýshy oqytyldy.
-Shomylýǵa qaýipti 228 orynda 430 tyıym salý belgisi ornatyldy. Eskertý belgilerine túgendeý júrgizilip, olar jańartyldy. Sondaı-aq shomylý maýsymy bastalǵaly QR Ákimshilik quqyq buzýshylyq týraly kodeksiniń 412-baby boıynsha 126 adam jaýapqa tartyldy. Aıyppuldyń jalpy somasy - 1 978 736 teńge. Sonyń ishinde tyıym salý belgilerin ornatpaǵany úshin 7 selolyq okrýg ákimine jáne ruqsatsyz jumys jasaǵany úshin 5 jaǵajaı ıesine ákimshilik aıyppul salyndy,- dep habarlady Aqtóbe oblystyq TJD baspasóz qyzmeti. Bıyl shaǵyn kemelerdi paıdalaný kezinde birqatar buzýshylyq anyqtalyp, 20 aıyppul salyndy.
Aıta keteıik, Aqtóbe qalasyndaǵy ózenderde ornatylǵan 33 beınebaqylaý kamerasy oblystyq TJD kezekshi bólimine qosylǵan. Sonymen qatar Hromtaý aýdanynda kún batareıalary arqyly jumys isteıtin 16 kamera bar. Beınejazbany aýyldyq okrýg ákimdikteri baqylaıdy.
- Shomylý maýsymynda oblys aýmaǵynda 6 adam mert boldy. Onyń úsheýi bala. Sý aıdyndaryndaǵy jazataıym oqıǵalardyń aldyn alý jumystarynyń nátıjesinde qaıǵyly jaǵdaı 33% tómendedi,- dep habarlady baspasóz qyzmeti.
Eske salsaq, shilde aıynda Aqtóbede jasóspirim sýǵa batyp ketti. Oqıǵa Áıteke bı aýdany Aqqum aýylynda boldy. Ol shomylýǵa tyıym salynǵan jerde sýǵa túsken.
