Aqtóbede shóbi órtenip jatqan aýyl turǵyndaryna kómek berilýde
AQTÓBE. QazAqparat - Shóbi órtengen Aqtóbe oblysy, Qosestek aýylynyń turǵyndaryna 100 myń teńgeden materıaldyq kómek kórsetildi. Al aýyldyń shóbin órtep júrgen kúdikti áli anyqtalǵan joq, dep habarlaıdy QazAqparat tilshisi.
Aqtóbe oblysy, Qarǵaly aýdanyna qarasty Qosestek aýylynyń turǵyndary áli úreı ústinde otyr. Buǵan deıin habarlaǵanymyzdaı, sońǵy kúnderi belgisiz bireýler eldiń shóbin órtep júr. Keıbirine «kezek sende» degen hat ta qaldyryp ketedi eken. Qaskóıler bank kartochkasyna 50 myń teńge aýdarýdy talap etedi. Qazir aýyldy qaraýyldaýǵa polıtsııa, tótenshe jaǵdaılar qyzmeti tartylǵan.
Búgin Óńirlik kommýnıkatsııalar qyzmetinen habarlaǵandaı, arnaıy qurylǵan komıssııa zardap shekken otbasylarǵa 100 myń teńgeden kómek kórsetýde. Al qaıyrymdy jandar azyq-túlik jetkizip jatyr.
«Órt oqıǵalary boıynsha qylmystyq is qozǵaldy. Tergeý jumystaryn arnaıy top júrgizip jatyr. Top quramyna Aqtóbe oblysynyń prokýratýra jáne polıtsııa departamentiniń qyzmetkerleri kirdi. Zardap shekkenderge naqty kómek kórsetý úshin jáne shyǵyndy anyqtaý maqsatynda aýdandyq máslıhat, «Nur Otan» partııasynyń aýdandyq fılıaly men jergilikti bılik ókilderinen qurylǵan komıssııa jasaqtaldy. Komıssııa quramy órtten zardap shekkendermen kezdesip, ár otbasyǵa kómek retinde 100 myń teńgeden tabys etti. Demeýshilerdiń kómegimen ár otbasyǵa azyq-túlik jetkizildi. Qazirgi ýaqytta aýylda 50 polıtsııa qyzmetkeri, tótenshe jaǵdaılar bólimi jáne jergilikti turǵyndardyń kúshimen táýlik boıyna kezekshilik uıymdastyryldy», - dep habarlady Óńirlik kommýnıkatsııalar qyzmetinen.
Al Aqtóbe oblystyq Polıtsııa departamentiniń baspasóz qyzmetinen málim etkendeı, kúdikti áli ustalǵan joq.
Atap ótilgendeı, búgingi kúni 700 úıi bar Qosestek aýyldyq okrýgindegi jaǵdaı turaqty. Órtke qatysty másele oblys basshylyǵynyń baqylaýyna alyndy. Sonymen qatar, jergilikti atqarýshy organdar men polıtsııa qyzmetkerleri qylmysty ashýǵa baǵyttalǵan sharalar keshenin júrgizýde.
