Aqtóbede sheteldikterge jumys kabınetin jóndetti dep aıyptalǵan polıtsııa qyzmetkeri sottaldy
AQTÓBE. KAZINFORM - №4 Aqtóbe qalalyq polıtsııa bólimi jergilikti polıtsııa qyzmeti bastyǵynyń orynbasary Aleksandr Bakshanov 6 jyl 6 aıǵa bas bostandyǵynan aıyryldy. Jazasyn qaýipsizdigi ortasha mekemesinde óteıdi.
№ 2 Aqtóbe qalalyq sotynda polıtsııa qyzmetkeri Aleksandr Bakshanovqa qatysty istiń úkimi shyqty. Sottalýshy Qylmystyq kodekstiń «Bılikti nemese laýazymdyq ókilettilikterdi asyra paıdalaný» baby boıynsha aıypty dep tanyldy.
- A. Bakshanov Qylmystyq kodekstiń 362-baby 4-bóligi 3-tarmaǵymen kináli dep tanylyp, 6 jyl 6 aıǵa bas bostandyǵynan, maıor sheninen aıyrsyn. Jazasyn óteý orny - qaýipsizdigi ortasha mekemesi. Memlekettik qyzmette, sýdıa, jergilikti ózin-ózi basqarý salasynda, Ulttyq bank pen onyń vedomstvolarynda, qarjy naryǵyn retteý, baqylaý jáne qadaǵalaý organdarynda, avıatsııa salasynda, kvazımemlekettik sýbektilerde jumys isteý quqyǵynan ómir boıyna aıyrsyn,- dedi sýdıa. Sonymen birge sot quqyq buzýshylyqqa jol bergen polıtsııa departamentiniń bastyǵyna jeke qaýly shyǵardy.
Eske salsaq, sottalýshy Bakshanov óz qyzmettik ókilettigigin asyra paıdalanyp, 8 sheteldikke qatysty isti qysqartýdy maqsat etedi. Olardyń bir bóligin ákimshilik jaýapkershilikten bosatyp, tek úsheýine hattama toltyrady. Sot sheshimimen Qazaqstannan shyǵarylýy tıis adamdardy óz kabınetine kirgizedi. Kabınettegi jóndeý jumystary vıdeoǵa túsip qalady.
