Aqtóbede sheteldikterdi tasymaldaǵan avtobýstyń jolaýshylary jylytý pýnktterine jetkizildi

AQTÓBE. KAZINFORM - Aqtóbede aıazdy kúni jol boıynda qutqarý jumysy júrgizildi. Sheteldikter mingen kólikterdiń 100-den astam jolaýshysy men júrgizýshisi jylytý pýnktine jetkizildi.

Aqtóbede túnde aıaz kúsheıdi. Joldyń bári ashyq bolǵanymen, polıtsııa men tótenshe jaǵdaılar qyzmeti baqylaýdy kúsheıtti.

- Polıtsııa jasaǵy Samara-Shymkent avtojolynyń Yrǵyz aýdany aýmaǵynda turǵan avtobýsty baıqaǵan. Jol jıegindegi avtobýsta 82 jolaýshysy boldy. Olar Shymkent-Ýfa baǵytyna qaraı jolǵa shyqqan. Trassada avtobýs isten shyqqan. Polıtsııa TJD qyzmetkerlerimen jáne jergilikti atqarýshy organdarmen birlesip, jylytý pýnktine 84 adamdy jetkizdi. Onyń ishinde 3 bala bar. Jolaýshylar RF, Ózbekstan jáne Tájikstan Respýblıkasynyń azamattary, - dep habarlady oblystyq PD baspasóz qyzmeti. 

Sonymen birge Samara - Shymkent tasjolynyń Qobda aýdany aýmaǵynda taǵy bir avtobýs toqtap qalǵan. Avtobýs BQO-dan OQO-ǵa qaraı baǵyt alǵan. Onda 25 sheteldik jolaýshy boldy. Júrgizýshisi men jolaýshylar jylytý pýnktine jetkizildi.

- Qazirgi ýaqytta Aqtóbe oblysyndaǵy respýblıkalyq jáne oblystyq mańyzy bar avtojoldarda ártúrli tehnıkalyq aqaýlary bar 30 aýyr júk avtokóligi jáne 2 avtobýs tur. Polıtsııa jáne jergilikti atqarýshy organdar olarǵa jan-jaqty kómek kórsetip jatyr, - dep habarlady. oblystyq PD baspasóz qyzmeti.

Eske salsaq, Túrkistanda respýblıkalyq mańyzy bar joldarǵa 5 beket, oblystyq mańyzy bar joldarǵa 2 beket ornatyldy.