Aqtóbede sheteldikter mingen avtobýs jolaýshylaryna kómek kórsetildi
AQTÓBE. KAZINFORM – Avtobýs Tájikstannan Reseıge baǵyt alǵan. Jolaýshylardyń bári kempıngke jetkizildi.
Aqtóbede aýa temperatýrasy –25 gradýsqa deıin tómendep, polıtsııa qyzmetkerleri respýblıkalyq tasjoldarda kómek kórsetti. Áıteke bı aýdany aýmaǵynda Tájikstannan Reseıge baǵyt alǵan avtobýs toqtap qaldy.
– Polıtsııa aýa raıynyń qolaısyzdyǵyna baılanysty qozǵalysty jalǵastyra almaǵan avtobýsty baıqady. Avtobýs salonynda 55 shetel azamaty bary anyqtaldy. Taǵy bir oqıǵa Hromtaý aýdanyna qarasty Bógetsaı aýylynyń mańynda boldy. Munda tehnıkalyq aqaýǵa baılanysty Ózbekstannan Reseıge baǵyt alǵan Largýs avtokóligi toqtaǵan. Kólikte jeti shetel azamaty boldy. Barlyq jaǵdaıda polıtsııa qyzmetkerleri qajetti kómek kórsetip, azamattardy ýaqytsha kempıngke ornalastyrdy. Onda jolaýshylarǵa jylynýǵa jáne demalýǵa múmkindik jasaldy, - dep habarlady Aqtóbe oblystyq PD baspasóz qyzmeti.
Aıta keteıik, Aqtóbede aldaǵy aptada da aıaz túspeıdi. Túnde -18-22 gradýsqa deıin tómendese, kúndiz -15-17 gradýs bolady. Oblystyq tótenshe jaǵdaılar departamentiniń habarlaýynsha, jeldiń jyldamdyǵy sekýndyna 7-12 metrge jetedi. 21qańtarda azdaǵan qar jaýaby, al aptanyń ózge kúnderi kún ashyq bolady.
Eske salsaq, 15-qańtar kúni Aqtóbede jolda qalǵan jedel járdem men avtobýs jolaýshylaryna kómek kórsetildi.
