Aqtóbede sheteldik kólikterdiń saqtandyrý polısin zańsyz rásimdegen áıel ustaldy
AQTÓBE. KAZINFORM – Kúdikti mamandandyrylǵan halyqqa qyzmet kórsetý ortalyǵy aldynda qolǵa tústi. Odan birneshe zańsyz qujat tabyldy.
Aqtóbe oblystyq Polıtsııa departamenti Uıymdasqan qylmysqa qarsy kúres basqarmasy avtoturaqta zańsyz kásip júrgizgen 47 jastaǵy áıeldi ustady. Kúdikti shetelde esepte turǵan avtokólikke saqtandyrý polısin rásimdegen. Al bul qujattyń eshqandaı zańdy kúshi joq.
- Ustalǵan áıeldiń avtokóligin tekserý kezinde polıtsııa qyzmetkerleri medıtsınalyq anyqtamalardy, oqý kýrstarynyń kýálikterin, sondaı-aq notarıýstyń móri basylǵan blankti tárkiledi. Bári de toltyrylmaǵan. Kúdikti júrgizýshi shaǵymynan soń ustaldy. Jol-kólik oqıǵasyna tap bolǵan aqtóbelik saqtandyrý kompanııasyna barady. Olar qujattyń jalǵan ekenin aıtqan. Júrgizýshi úsh aı merzimge saqtandyrý polısin rásimdegen eken. Jalǵan qujattardy jasaý jáne ótkizý belgileri boıynsha sotqa deıingi tergep-tekserý bastaldy,- dep habarlady Aqtóbe oblystyq Polıtsııa departamentiniń baspasóz qyzmeti.
Qazir ózge de sybaılas adamdardyń bar-joǵy anyqtalyp jatyr.
Eske salsaq, Shymkentte júrgizýshi kýáligin zańsyz berý faktisi boıynsha uzaq ýaqytqa sozylǵan sot otyrysy aıaqtaldy. Mamandandyrylǵan halyqqa qyzmet kórsetý ortalyǵynyń qyzmetkerleri memlekettik qyzmetti tabys kózine aınaldyryp, júrgizýshi kýáligin mindetti emtıhansyz berip kelgen. Olardyń sany 500 adamdy qurady.